ఆ దేశాల్లో బలగాల ఉపసంహరణకు అమెరికా ప్రణాళిక

ఇరాక్​, అఫ్గానిస్థాన్​లోని తమ బలగాలను భారీగా వెనక్కి పిలిపించేందుకు ప్రణాళికలు రూపొందించింది అమెరికా. ఈ క్రమంలో వచ్చే ఏడాది జనవరి నాటికి ఆయా దేశాల్లో 2,500 బలగాలు మాత్రమే ఉండనున్నట్టు రక్షణ కార్యదర్శి వెల్లడించారు.

ఇరాక్​, అఫ్గానిస్థాన్​లోని తమ బలగాలను ఉపసంహరించుకునేందుకు కొత్త ప్రణాళికను రూపొందించింది అమెరికా. ఇందుకు సంబంధించిన వివరాలను అగ్రరాజ్యంలో కొత్తగా నియమితులైన రక్షణ కార్యదర్శి క్రిస్టఫర్​ మిల్లర్​ వెల్లడించారు. ఈ ప్రణాళికతో అఫ్గానిస్థాన్​లోని 4,500 బలగాలు 2,500కు, ఇరాక్​లోని 3వేల బలగాలు 2,500కు తగ్గుతాయని పేర్కొన్నారు.

అమెరికా, తన మిత్రదేశాలు సురక్షితంగా ఉన్నప్పుడు బలగాలను ఉపసంహరించుకుంటామన్న అధ్యక్షుడు డొనాల్డ్​ ట్రంప్​ ప్రతిజ్ఞకు ఈ సరికొత్త ప్రణాళిక దోహదపడుతుందని తేలిపారు మిల్లర్​. ఈ ప్రక్రియకు కమాండర్లు, సలహాదారులు అంగీకరించినట్టు స్పష్టం చేశారు.

అయితే అనేకమంది నిపుణులు, మిలిటరీ అధికారులు.. బలగాల ఉపసంహరణలో ఇంత వేగం పనికిరాదని హెచ్చరిస్తున్నారు.

మరోవైపు అధ్యక్ష ఎన్నికల విజేత జో బైడెన్​.. వచ్చే ఏడాది జనవరి 20న ప్రమాణస్వీకారం చేయనున్నారు. అందుకు 5రోజుల ముందే ఈ బలగాల ఉపసంహరణ ప్రక్రియ ముగుస్తుండటం గమనార్హం.

ఇదీ చూడండి:-సోమాలియాలో ఉగ్రదాడి- ఐదుగురు మృతి