ప్రపంచ నలుమూలలా అమెరికా సైనికులు ఉంటారు. పెద్దన్న పాత్ర పోషించడంలో అగ్రరాజ్యానికి ఇది ఎంతో కీలకం. అయితే.. ఈ భద్రతా దళాల కూర్పు రూపంలో అగ్రరాజ్యానికి కొత్త సమస్య వచ్చి పడింది. మరి దీనిని నూతన అధ్యక్షుడు జో బైడెన్ ప్రభుత్వం ఎలా పరిష్కరిస్తారు?
సమీక్షతో..
పశ్చిమాసియాలోనే అమెరికా బలగాలు ఎక్కువగా ఉన్నాయి. అయితే ఇటీవలి కాలంలో చైనా, రష్యా నుంచి అగ్రరాజ్యానికి అనేక సవాళ్లు ఎదురువుతున్నాయి. ఈ నేపథ్యంలో పశ్చిమాసియాలో ఎక్కువ మార్పులు చేయకుండానే చైనా, రష్యాపై దృష్టిపెట్టాలని అమెరికా యోచిస్తోంది. ఇది ఒక సమస్య. బడ్జెట్ వ్యవహారం మరో సమస్య.
ఇలాంటి సమస్యలను పరిష్కరించేందుకు.. రక్షణ మంత్రిగా బాధ్యతలు చేపట్టిన కొద్ది రోజుల్లోనే.. అంతర్జాతీయంగా బలగాల మోహరింపుపై సమీక్షకు ఆదేశించారు లాయిడ్ ఆస్టిన్. బైడెన్ విదేశీ విధానానికి తగ్గట్టుగా.. దళాలు, ఆయుధాలు, శిబిరాలను ఎలా వినియోగించవచ్చో తేల్చడమే ఈ సమీక్ష ముఖ్యోద్దేశం.
ఇదీ చూడండి:-చైనా కట్టడికి అమెరికా 'టాస్క్ఫోర్స్' వ్యూహం
ట్రంప్ చర్యలతో..
యుద్ధానికి సర్వసన్నద్ధమై ఉండాలన్న అగ్రరాజ్య సైనిక ప్రాధాన్యంపై ఈ సమీక్ష దీర్ఘకాల ప్రభావం చూపే అవకాశముంది. అదే సమయంలో.. మాజీ అధ్యక్షుడు డొనాల్డ్ ట్రంప్ 'అమెరికా ఫస్ట్' విధానంతో మిత్ర దేశాలతో దెబ్బతిన్న సంబంధాలను కూడా బైడెన్ ప్రభుత్వం దృష్టిలో పెట్టుకోవాల్సి ఉంటుంది.
మరోవైపు.. అఫ్గానిస్థాన్ నుంచి పూర్తిస్థాయిలో బలగాల ఉపసంహరణకు గత ప్రభుత్వం తీసుకున్న నిర్ణయంపై తికమక పడుతోంది బైడెన్ బృందం. దానిపైనా సమీక్షలో స్పష్టత వచ్చే అవకాశముంది.
టార్గెట్ చైనా
చైనా విషయంలో ట్రంప్, బైడెన్ వైఖరి ఒకే విధంగా ఉంది. ఐసిస్, లష్కరే తోయిబా వంటి ఉగ్రసంస్థల కన్నా చైనా నుంచి ఎక్కువ సవాళ్లు ఎదురువుతాయని నాడు ట్రంప్ విశ్వసించారు. ఇప్పుడు బైడెన్ కూడా అదే ధోరణిలో ఉన్నారు. అదే సమయంలో ఐరోపాకు బైడెన్ అధిక ప్రాధాన్యం ఇస్తున్నారు. ఈ తరుణంలో బలగాల మోహరింపులో చెప్పుకోదగ్గ మార్పులు జరిగే అవకాశముంది.
సాంకేతికత, భౌగోళిక రాజకీయాలను ఆధారంగా చేసుకుని.. బలగాల మోహరింపులో పాటిస్తున్న పాత పద్ధతికి స్వస్తి చెప్పాలని జాయింట్ చీఫ్ ఆఫ్ స్టాఫ్ ఛైర్మన్ మార్క్ మిల్లే అభిప్రాయపడ్డారు. బలగాలను చిన్న చిన్న బృందాలుగా విభజించాలని సూచించారు. అలా అయితే వాటిని అన్నివైపులా మోహరించేందుకు వీలుంటుందని.. ఎవరూ గుర్తించకుండా వేగంగా కదిలేందుకు అవకాశముంటుందని పేర్కొన్నారు.
అటు పసిఫిక్ ప్రాంతంలో చైనా ఆధిపత్యాన్ని కట్టడి చేసేందుకు అమెరికా చర్యలు చేపట్టాల్సి ఉంటుంది.
రష్యాతో..
అదే సమయంలో ఆర్కిటిక్లో రష్యా ఆధిపత్యంపైనా ఆందోళన వ్యక్తం చేశారు ఆస్టిన్. ఆ ప్రాంతంలో రష్యా బలగాల దూకుడు ఆందోళనకరంగా ఉందని అభిప్రాయపడ్డారు.
ఇదీ చూడండి:-సూకీ నిర్బంధం పొడిగింపుపై అమెరికా ఆవేదన
