'మీతో పాటు.. సైన్యమూ నిర్ణయం తీసుకోవాలి'

పాకిస్థాన్​లో తీవ్రవాద నిర్మూలనకు ​ప్రధాని ఇమ్రాన్​ ఖాన్​ సరైన చర్యలు చేపట్టామని చెప్పినట్లుగానే ఆ దేశ సైన్యం కూడా సరైన నిర్ణయాలు తీసుకోవాలని అమెరికా పేర్కొంది. తీవ్రవాద సంస్థలకు మద్దతు పలికే పాక్​ విధానాలను మార్చేందుకు ప్రయత్నాలు చేపడుతున్నట్లు తెలిపింది.

ఉగ్రవాదంపై పాకిస్థాన్​ సరైన చర్యలు చేపడుతోందన్న ప్రధానమంత్రి ఇమ్రాన్​ ఖాన్​ వ్యాఖలను పేర్కొంటూ.. ఆ దేశ సైన్యం కూడా సరైన నిర్ణయాలు తీసుకోవాలని అగ్రరాజ్యం అమెరికా తెలిపింది. మసూద్​ అజార్​ను అంతర్జాతీయ ఉగ్రవాదిగా ఐరాస ప్రకటించిన కొద్ది గంటల్లోనే ట్రంప్​ పరిపాలన విభాగం ఈ వ్యాఖ్యలు చేయటం ప్రాధాన్యం సంతరించుకుంది.

తీవ్రవాద సంస్థలకు మద్దతు తెలిపే పాక్​ విధానాలను మార్చేందుకు అమెరికా ప్రయత్నిస్తోందని అగ్రరాజ్య పరిపాలన విభాగం సీనియర్​ అధికారి ఒకరు తెలిపారు. పాక్​ అంతర్గత రాజకీయాల్లో జోక్యం చేసుకోవాలనుకోవట్లేదని.. పాక్​లోని పరిస్థితులను సైన్యం చక్కబెడుతుందని ఆశిస్తున్నామన్నారు. తీవ్రవాదంపై సైన్యాధికారులు కూడా సరైన నిర్ణయాలు, విధానాలు చేపట్టాలన్నారు.

తీవ్రవాదంపై చర్యలు తీసుకున్నామన్న పాకిస్థాన్​ను అభినందిస్తున్నామని తెలిపారు ఆ అధికారి. గతంలో జరిగిన విషయాలను దృష్టిలో ఉంచుకుని ఇప్పుడే పూర్తిస్థాయిలో పాక్​ను ప్రశంసించలేమన్నారు. కానీ సరైన నిర్ణయాలు తీసుకుంటారని ఆశిస్తున్నట్లు పేర్కొన్నారు.

జైషే మహ్మద్​ ఉగ్రవాద సంస్థ వ్యవస్థాపకుడు మసూద్​ అజార్​ను అంతర్జాతీయ ఉగ్రవాదిగా గుర్తించటం క్లిష్టమైన చర్యగా పేర్కొన్నారు. అతని ప్రయాణ నిషేధం, ఆస్తుల జప్తు వంటి ఇతర చర్యలను చేపట్టేందుకు పాకిస్థాన్​ బాధ్యత ముఖ్యమైనదిగా తెలిపారు. వారు ఇప్పుడు అంతర్జాతీయ సమాజానికి జవాబుదారీగా ఉన్నారని అభిప్రాయపడ్డారు.

ఇదీ చూడండి:ఆ ఒక్క మార్కు వచ్చి ఉంటే: సీబీఎస్​ఈ టాపర్​