కీలక డిమాండ్​తో సత్య నాదెళ్లకు ఉద్యోగుల లేఖ

జార్జి ఫ్లాయిడ్​ హత్యతో అమెరికాలో పోలీసులపై ఆగ్రహం పెల్లుబుకుతోంది. పోలీసులతో ఒప్పందాలను రద్దు చేసుకోవాలని మైక్రోసాఫ్ట్ ఉద్యోగులు సీఈఓ సత్యనాదెళ్లకు లేఖ రాశారు. ఐబీఎం సీఈఓ అరవింద్ కృష్ణ కూడా ముఖ కవళికల గుర్తింపు సాఫ్ట్​వేర్ అందించమని అమెరికా కాంగ్రెస్​కు స్పష్టం చేశారు.

ఆఫ్రో-అమెరికన్ జార్జి ఫ్లాయిడ్‌ కస్టడీ హత్య తర్వాత అగ్రరాజ్యంలో పోలీసులకు వ్యతిరేకంగా అనేక మంది గళమెత్తుతున్నారు. ఇదే క్రమంలో సియాటెల్​ పోలీసు విభాగం, చట్టసంస్థలతో ఒప్పందాలను రద్దు చేసుకోవాలని మైక్రోసాఫ్ట్ సీఈఓ సత్య నాదెళ్లను ఆ సంస్థ ఉద్యోగులు కోరుతున్నారు.

ఈ మేరకు సత్య నాదెళ్లతోపాటు వైస్​ ప్రెసిడెంట్​ కర్ట్​ డెల్​బెనీకి 250 మంది మైక్రోసాఫ్ట్ ఉద్యోగులు లేఖలు రాశారు. ఒప్పందాల రద్దుతోపాటు బ్లాక్​ లైవ్స్​ మ్యాటర్ ఉద్యమానికి మద్దతు పలుకుతూ సియాటెల్​ మేయర్​ రాజీనామాకు డిమాండ్ చేయాలని కోరినట్లు తెలుస్తోంది. ఆందోళనల్లో పాల్గొన్నవారిని అణచివేసేందుకు ఎస్పీడీ దళాలు హింసాత్మక ధోరణిని అవలంబించాయని ఈ లేఖలో పేర్కొన్నారు.

మద్దతుగా ఉంటాం..

ఇప్పటికే నల్లజాతీయులకు, ఆఫ్రో అమెరికన్లకు మద్దతుగా నిలుస్తామని నాదెళ్ల ప్రకటించారు.

"మన సమాజంలో జాతి వివక్ష, విద్వేషానికి చోటు ఉండకూడదు. సహానుభూతి వ్యక్తం చేయడం, ఎదుటివారిని అర్థం చేసుకోవడం ప్రారంభమైనా.. మనం చేయాల్సింది చాలా ఉంది. నల్లజాతీయులు, ఆఫ్రో-అమెరికన్లకు మద్దతుగా నిలుస్తా. మా సంస్థలో దీన్ని అమలు చేసేందుకు మేం కట్టుబడి ఉన్నాం."

- సత్య నాదెళ్ల

ఆ సాఫ్ట్​వేర్​ను అందించం..

మరో భారతీయ అమెరికన్, ఐబీఎం సీఈఓ అరవింద్ కృష్ణ కూడా ఇదే విధంగా స్పందించారు. ముఖ కవళికల గుర్తింపు, విశ్లేషణ సాఫ్ట్​వేర్​ను అందించమని అమెరికా కాంగ్రెస్​కు స్పష్టం చేశారు. సామూహిక నిఘా, జాతిపరమైన ప్రొఫైలింగ్, మానవ హక్కుల ఉల్లంఘనను తీవ్రంగా వ్యతిరేకిస్తున్నట్లు తెలిపారు.

అమెరికాలో జాతి సమానత్వాన్ని పెంపొందించేందుకు అవసరమైన విధాన ప్రతిపాదనలను లేఖ ద్వారా అమెరికా కాంగ్రెస్​కు వివరించారు అరవింద్.

ఇదీ చూడండి:ఆ మహిళ మెయిల్​తో డిక్షనరీలో పదానికి అర్థం మార్పు!