కొవిడ్‌-19పై పోరులో అమెరికా అధ్యక్షుడు ట్రంప్ విఫలమయ్యారని విమర్శిస్తున్న వారి జాబితాలో మాజీ అధ్యక్షుడు బరాక్ ఒబామా సైతం చేరారు. మహమ్మారి కట్టడిలో ట్రంప్ తీరును ఆయన తీవ్రంగా తప్పుబట్టారు. ఈ మేరకు తన హయాంలో పనిచేసిన సిబ్బందితో శుక్రవారం ఒబామా మాట్లాడిన సంభాషణ ఒకటి వెలుగులోకి వచ్చింది.
ట్రంప్ తొలి జాతీయ భద్రతా సలహాదారు మైఖేల్‌ ఫ్లిన్‌పై వచ్చిన ఆరోపణల్ని ఎత్తివేయడంపైనా ఒబామా తీవ్ర అసంతృప్తి వ్యక్తం చేశారు. మరికొన్ని నెలల్లో అధ్యక్ష ఎన్నికలు జరగనున్న నేపథ్యంలో ఒబామా తిరిగి రాజకీయపరమైన వ్యాఖ్యలు చేయడం ప్రస్తుతం చర్చనీయాంశంగా మారింది.
బిడెన్కు మద్దతు....
కొవిడ్‌-19ను ట్రంప్ ఎదుర్కొన్న తీరును 'గందరగోళ విపత్తు'గా ఒబామా అభివర్ణించారు. 'ఒబామా అలమ్నీ అసోసియేషన్‌'లోని 3 వేల మంది సభ్యులతో మాట్లాడిన ఆయన డెమొక్రటిక్‌ అభ్యర్థి జో బిడెన్కు మద్దతివ్వాలని పిలుపునిచ్చారు.
''స్వార్థం, ఆటవికత, విభజన, ఇతరుల పట్ల శత్రుత్వ భావం వంటి పోకడలు ప్రస్తుతం అమెరికావాసుల జీవితాల్లో భాగమయ్యాయి. అంతర్జాతీయంగానూ ఇదే తీరు కొనసాగుతోంది. ఈ పరిణామాల వల్లే తాజా సంక్షోభాన్ని ఎదుర్కోవడంలో ప్రపంచ దేశాలు చాలా పేలవంగా స్పందిస్తున్నాయి.''