ఓటింగ్‌ సమయం సమీపిస్తున్న వేళ.. అమెరికాలో ఎన్నికల వేడి మరింత పెరిగింది. అధ్యక్షుడు డొనాల్డ్ ట్రంప్.. ప్రత్యర్థి, డెమోక్రటిక్ అధ్యక్ష అభ్యర్థి జో బైడెన్ ఒకరిపై ఒకరు తీవ్ర విమర్శలు చేసుకుంటున్నారు. తాజాగా ఫ్లోరిడాలో జరిగిన ఎన్నికల ప్రచారంలో పాల్గొన్న ట్రంప్.. బైడెన్ లక్ష్యంగా విమర్శలు గుప్పించారు. నవంబర్‌ 3న జరిగే అధ్యక్ష ఎన్నికలు అమెరికన్లకు ఎంతో కీలకమని వ్యాఖ్యానించారు. తన పరిపాలనలో వైరస్‌ నుంచి వేగంగా కోలుకోవటమా లేక.. బైడెన్ను గెలిపించి నిరాశావాదంలో కూరుకుపోవటమా అనేది అమెరికన్లు తేల్చుకోవాలని ట్రంప్ సూచించారు. ప్రత్యర్థి జో బైడెన్కు అమెరికా అధ్యక్షుడు అయ్యే సామర్థ్యం లేదన్న ట్రంప్.. ఇది తమ మధ్య జరిగిన చివరి సంవాదంలో తేలిపోయిందని పేర్కొన్నారు.
మరోవైపు ట్రంప్ విమర్శలకు బైడెన్ దీటుగా ప్రతిస్పందించారు. వైరస్‌పై పోరాడటాన్ని ట్రంప్ పూర్తిగా విస్మరించారన్న ఆయన.. ట్రంప్ పాలనలో వేల మంది అమెరికన్లు కరోనా బారినపడి మరణించారని గుర్తుచేశారు. తాను అధ్యక్షుడిగా ఎన్నికైతే కరోనా వ్యాక్సిన్‌ను అమెరికన్లకు ఉచితంగా అందిస్తానని హామీ ఇచ్చారు. మహమ్మారి కారణంగా ఆర్థికంగా దెబ్బతిన్న అమెరికన్లను ఆదుకుంటానని జో భరోసా ఇచ్చారు.
ఇదీ చూడండి:-ట్రంప్- బైడెన్ గ్రాఫ్లో మార్పు... తేడా 4 పాయింట్లే!