'సమాజంలో ద్వేషం, జాత్యహంకారానికి చోటు లేదు'

అమెరికాలో జరుగుతున్న అల్లర్లపై స్పందించారు పలువురు ప్రముఖులు. సమాజంలో ద్వేషం, జాత్యహంకారానికి తావులేదన్న మైక్రోసాఫ్ట్​ సీఈఓ సత్య నాదేళ్ల.. ఇతరుల భావాలను అర్థం చేసుకోవాలన్నారు. న్యాయం కోసం పోరాడుతున్న వారికి మద్దతుగా నిలవాలని పెప్సికో మాజీ సీఈఓ నూయి పిలుపునిచ్చారు.

అమెరికాలో నల్ల జాతీయుడు జార్జ్‌ ఫ్లాయిడ్‌ మరణంపై మైక్రోసాఫ్ట్​ సీఈఓ సత్య నాదేళ్ల సహా ప్రముఖులు స్పందించారు. సమాజంలో ద్వేషం, జాత్యహంకారానికి చోటు లేదన్న సత్య నాదేళ్ల..ఇతరుల భావాల్ని అర్థం చేసుకొని గౌరవించాలన్నారు. నల్లజాతి, ఆఫ్రికన్‌ అమెరికన్ల స్వరాన్ని వినిపించేందుకు మైక్రోసాఫ్ట్‌ను వేదికగా నిలుపుతామని ఆ సంస్థ ప్రకటించింది.

నల్లజాతి అమెరికన్ల బాధను వ్యవస్థీకృత జాత్యహంకారాన్ని అర్థం చేసుకోవాల్సిన బాధ్యత అందరిపై ఉందని పెప్సీకో మాజీ సీఈఓ ఇంద్రా నూయి వ్యాఖ్యానించారు. న్యాయం కోసం పోరాడుతున్న వారికి మద్దతుగా నిలవాలని ఈ గాయాన్ని ఎలా నయం చేయాలో కూడా ఆలోచించాలని నూయి భావోద్వేగ ట్వీట్‌ చేశారు.

ఆఫ్రికన్‌-అమెరికన్లకు బాసటగా అమెరికాలోని గూగుల్‌, యూట్యూబ్‌ హోం పేజీలను మార్చినట్లు గూగుల్‌ సీఈవో సుందర్‌ పిచాయ్‌ ప్రకటించారు. ఆవేదనతో పోరాడుతున్న వారు ఏకాకులు కాదని, జాతి సమానత్వం కోసం ఉద్యమిస్తున్నవారికి సంఘీభావంగా నిలుస్తామని పిచాయ్‌ తెలిపారు.

ఇదీ చూడండి:విద్యుత్​ తీగలు తగిలి వ్యక్తి సజీవదహనం