కరోనా మహమ్మారి విలయంలో ప్రపంచదేశాలు విలవిల్లాడుతున్నాయి. వైరస్ విజృంభణతో రోజురోజుకు కేసుల సంఖ్య పెరుగుతోంది. మొత్తం కేసుల సంఖ్య 2.34కోట్లు దాటింది. 8.09లక్షల మంది ప్రాణాలు కోల్పోయారు. అమెరికా, బ్రెజిల్, రష్యాల్లో వైరస్ ఉద్దృతి ఎక్కువగా ఉంది. సింగపూర్, నేపాల్లో వైరస్ మళ్లీ విజృంభిస్తోంది.
ప్రపంచవ్యాప్తంగా 2.34 కోట్లు దాటిన కరోనా కేసులు
By
Published : Aug 23, 2020, 7:56 PM IST
ప్రపంచంపై కరోనా మహమ్మారి విరుచుకుపడుతోంది. ప్రపంచవ్యాప్తంగా ఇప్పటి వరకు 2కోట్ల 34లక్షలకుపైగా మంది వైరస్ బారిన పడ్డారు. 8.09 లక్షల మంది ప్రాణాలు కోల్పోయారు. ఇదే సమయంలో కోటీ 59లక్షలకుపైగా వైరస్ నుంచి కోలుకోవటం ఊరట కలిగిస్తోంది.
మొత్తం కేసులు: 2,34,10,988
మరణాలు: 8,09,142
కోలుకున్నవారు: 1,59,43,510
యాక్టివ్ కేసులు: 66,58,336
అమెరికాలో కరోనా విజృంభణ కొనసాగుతూనే ఉంది. రోజురోజుకు కేసుల సంఖ్యలో గణనీయమైన పెరుగుదల నమోదవుతోంది. 58.42 లక్షల మంది వైరస్ బారినపడగా.. 31.48లక్షల మంది కోలుకున్నారు. 1.80లక్షల మంది ప్రాణాలు కోల్పోయారు.
బ్రెజిల్లో వైరస్ ఉద్ధృతి తగ్గడం లేదు. 35.83లక్షల మందికి వైరస్ సోకింది. లక్షా 14వేలకుపైగా వైరస్కు బలయ్యారు. ఇప్పటి వరకు 27.09లక్షల మంది వైరస్ నుంచి కోలుకున్నారు.
నేపాల్లో రికార్డు స్థాయిలో ఆదివారం 818 కొత్త కేసులు నమోదయ్యాయి. ముగ్గురు ప్రాణాలు కోల్పోయారు. మొత్తం కేసుల సంఖ్య 31,935కు, మరణాల సంఖ్య 149కి చేరింది. కొత్త కేసుల్లో కాఠ్మాండులోనే 166 ఉన్నాయి. దేశవ్యాప్తంగా మొత్తం 18,631 మంది వైరస్ నుంచి కోలుకున్నారు.
సింగపూర్లో వైరస్ మళ్లీ విజృంభిస్తోంది. కరోనాను పూర్తిస్థాయిలో అరికట్టినట్లు ప్రకటించిన నెలరోజుల తర్వాత దేశంలోని అతిపెద్ద విదేశీ కార్మికుల వసతి గృహంలో కొత్త కరోనా క్లస్టర్ను గుర్తించారు. ఇందులో భారతీయులు కూడా ఉన్నారు. సింగపూర్లో ఆదివారం కొత్తగా 87మంది వైరస్ బారినపడ్డారు. మొత్తం కేసుల సంఖ్య 56,353కు చేరింది.
పాకిస్థాన్లో కొత్తగా 591 కేసులు నమోదయ్యాయి. మొత్తం కేసుల సంఖ్య 2,92,765కు చేరింది. ఆదివారం నలుగురు మృతిచెందగా.. మొత్తం మరణాల సంఖ్య 6,235కు చేరింది. 2,75,836 మంది వైరస్ నుంచి కోలుకున్నారు.
