కరోనాపై పోరుకు నాసా 'వైటల్' అస్త్రం!

కరోనాతో తీవ్రంగా ప్రభావితమైంది అగ్రరాజ్యం అమెరికా. ఇప్పటివరకు 8 లక్షల 86వేలకు పైగా అక్కడ వైరస్ బారినపడ్డారు. ఈ నేపథ్యంలో కరోనా బాధితుల కోసం అమెరికా అంతరిక్ష పరిశోధనా సంస్థ నాసా 'వైటల్' పేరుతో ఓ వెంటిలేటర్​ను రూపొందించింది. వ్యాధి లక్షణాలు స్వల్పంగా ఉన్న రోగులకు దీనిని వినియోగించనుంది.

అమెరికా అంతరిక్ష పరిశోధనా సంస్థ నాసా కరోనాపై పోరుకు ఓ సరికొత్త అస్త్రాన్ని రూపొందించింది. వైరస్ బాధితులకు అమర్చేందుకు అధిక పీడనం కలిగిన వెంటిలేటర్​ను అభివృద్ధి చేసింది. వైటల్​(వెంటిలేటర్ ఇంటర్​వెన్షన్ టెక్నాలజీ అక్సెసిబుల్ లోకల్లీ) అని పిలిచే ఈ పరికరం ద్వారా కొవిడ్-19 బాధితులకు కృత్రిమ శ్వాస అందించనున్నారు. వ్యాధి లక్షణాలు స్వల్పంగా ఉన్న రోగులకు దీనిని ఉపయోగించనున్నారు. వ్యాధి తీవ్రమైన వారికి సాధారణ వెంటిలేటర్లు అందుబాటులో ఉండాలనే వ్యూహంతో వైటల్​ను రూపొందించినట్లు సమాచారం.

"మేం అంతరిక్ష పరిశోధనల్లో నిపుణులం కానీ.. వైద్య పరికరాల తయారీలో కాదు. అయితే ఉత్తమ ఇంజినీరింగ్, కఠినమైన టెస్టింగ్, వేగవంతమైన తయారీ మా ప్రత్యేకతలు. వైద్య సిబ్బందికి, సమాజానికి మేము ఏవిధంగా ఉపయోగపడతామని ఆలోచించి.. ఈ వెంటిలేటర్​ను రూపొందించాం."

-మిషెల్ వాట్​కిన్స్, జెట్ ప్రొపల్షన్ ల్యాబొరేటరీ, నాసా

ప్రస్తుతం అత్యవసర సమయంలో ఈ వెంటిలేటర్​ను వినియోగించేందుకు అమెరికా ఔషధ ప్రాధికార సంస్థ-ఎఫ్​డీఏ ఆమోదం కోసం దరఖాస్తు చేసింది నాసా.

ప్రత్యేకతలు ఇవే..

సంప్రదాయ వెంటిలేటర్​తో పోల్చితే తక్కువ సమయంలోనే వైటల్​ను తయారు చేయవచ్చు. సులభంగా నిర్వహించవచ్చు. ఆసుపత్రులు, కన్వెన్షన్ సెంటర్లు, హోటళ్లు వంటి చోట్ల ఉపయోగించేందుకు వీలుగా దీనిని రూపొందించారు.

ఇదీ చూడండి:వందల మంది వృద్ధులకు ఆత్మీయ నేస్తం ఆ చిన్నారి