'అంగారకుడిపై హెలికాప్టర్'​ ఎగిరేందుకు మరింత సమయం!

ఇటీవల మార్స్​ ఉపరితలం మీదకు అడుగుపెట్టిన ఇన్​జెన్యూటీ హెలికాప్టర్​ను ఎగిరేలా చేసే ప్రయోగాన్ని వాయిదా వేస్తున్నట్లు నాసా ప్రకటించింది. అనుకున్న దాని ప్రకారం ఆదివారం చేపట్టాల్సిన ఈ ప్రయోగం.. సిస్టంలో ఏర్పడిన సాంకేతిక లోపాల కారణాలతో నిలిచిపోయినట్లు తెలిపింది. ​

అంగారకుడి ఉపరితలంపైకి అమెరికా అంతరిక్ష పరిశోధన సంస్థ(నాసా) ప్రవేశ పెట్టిన ఇన్‌జెన్యూటీ హెలికాప్టర్‌ ఎగరడానికి మరింత సమయం పట్టేలా ఉంది. వాస్తవానికి ఈ ప్రయోగం.. ఆదివారమే జరగాల్సి ఉంది. కానీ ఈ ప్రయోగాన్ని ఈ నెల 14కు వాయిదా వేయాలని నిర్ణయించింది నాసా.

శుక్రవారం తలపెట్టిన రోటర్ల హై-స్పీడ్ స్పిన్ పరీక్షలో 'వాచ్​డాగ్' టైమర్ కమాండ్ సీక్వెన్స్ ప్రారంభంలోనే ముగిసిందని తెలిపింది నాసా. దీంతో ప్రయోగాన్ని ఈ నెల 14కు వాయిదా వేస్తున్నట్లు ప్రకటించింది. ఫ్లైట్ కంప్యూటర్‌ను 'ప్రీ-ఫ్లైట్' నుంచి 'ఫ్లైట్' మోడ్‌కు మార్చే క్రమంలో ఇలా జరిగినట్లు వెల్లడించింది. అయితే హెలికాప్టర్ సురక్షితంగా ఉందని.. అక్కడి నుంచి సమాచారం భూమికి అందుతోందని వెల్లడించారు.

సాధారణంగా వాచ్​డాగ్​ టైమర్​ కమాండ్​ సీక్వెన్స్​లను పూర్తి స్థాయిలో పర్యవేక్షిస్తుంది. సిస్టమ్​లో ఏదైనా తప్పు ఉంటే వెంటనే హెచ్చరికలు భూమికి పంపుతుంది. ఫలితంగా.. ఇందులో ఏర్పడిన సాంకేతిక సమస్యల కారణంగా వాయిదా వేశారు.

అంగారకుడిపై జీవం పుట్టుకకు సంబంధించి అమెరికా అంతరిక్ష పరిశోధన సంస్థ నాసా 2020లో రోవర్‌ను పంపిన విషయం తెలిసిందే. అది ఫిబ్రవరి 18న అంగారకుడిపై ల్యాండ్‌ అయింది. ఆ రోవర్‌ నుంచి ఇన్‌జెన్యూటీ హెలికాప్టర్‌ను నాసా ఇటీవల అంగారకుడి ఉపరితలంపైకి దింపింది.

ఇదీ చూడండి:అంగారకుడి‌పై హెలికాప్టర్‌.. ఎగిరేందుకు సిద్ధం!