భారత్-అమెరికా ద్వైపాక్షిక సంబంధాలు మరింత బలోపేతం అయ్యే దిశగా అడుగులు పడుతున్నాయి. దీనికి బలం చేకూర్చే విధంగా ప్రధాని నరేంద్ర మోదీ, అమెరికా అధ్యక్షుడు ట్రంప్ వరుసగా సమావేశమవుతున్నారు.
ఇటీవల జపాన్లో జీ-20, ఫ్రాన్స్లో జీ-7 సదస్సుల సందర్భంగా రెండు సార్లు భేటీ అయిన ఇరువురు అగ్రనేతలు.. వచ్చే వారంలో మరో రెండు సార్లు సమావేశమవనున్నారు.
ఈ నెల 22న హ్యూస్టన్లో జరగనున్న హౌదీ-మోదీ కార్యక్రమంలో భాగంగా తొలుత ట్రంప్, మోదీ భేటీ అవుతారు. అనంతరం.. వచ్చే వారం న్యూయార్క్ వేదికగా జరగనున్న ఐక్యరాజ్యసమితి సాధారణ అసెంబ్లీ సమావేశంలో మరోమారు సమావేశం కానున్నట్లు అమెరికాలోని భారత రాయబారి హర్షవర్ధన్ ష్రింగ్లా వెల్లడించారు. భారత్-అమెరికా వ్యూహాత్మక సంబంధాలు ఈ శతాబ్దంలోనే వినూత్న భాగస్వామ్యం దిశగా సాగనున్నాయన్నారు.
వచ్చే ఐదేళ్లలో ఇరు దేశాల మధ్య ద్వైపాక్షిక వాణిజ్యం రెట్టింపయి.. 280 బిలియన్ డాలర్లకు చేరుకుంటుందని ఆశాభావం వ్యక్తం చేశారు ష్రింగ్లా. వాణిజ్య సమస్యలు పరిష్కరించుకునేందుకు ఎప్పటికప్పుడు చర్చలు జరుగుతాయన్నారు.
ఇదీ చూడండి:భారత్కు జై కొట్టిన ఐరోపా సమాఖ్య.. పాక్కు చెంపపెట్టు
