విమానం కూలినా ప్రాణాలతో బయటపడ్డ బాలిక- క్షేమంగా ఇంటికి

Michigan plane crash: అమెరికాలో జరిగిన విమాన ప్రమాదం నుంచి బయటపడిన పదకొండేళ్ల బాలిక ఆరోగ్య పరిస్థితి మెరుగైంది. ఆమెను ఆస్పత్రి నుంచి విడుదల చేసినట్లు వైద్యులు తెలిపారు. లానీ మినహా ప్రమాద సమయంలో విమానంలో ప్రయాణిస్తున్న వారంతా మరణించారు.

Michigan plane crash:అమెరికా మిషిగన్​లో జరిగిన విమాన ప్రమాదాన్ని జయించిన లానీ పెర్డూ అనే పదకొండేళ్ల బాలిక ఆస్పత్రి నుంచి డిశ్ఛార్జ్​ అయింది. నవంబర్ 13న బీవర్ ఐలాండ్​లో జరిగిన ప్రమాదంలో లానీ తండ్రి మైక్ పెర్డూ సహా నలుగురు మరణించారు. బాలిక మాత్రం ప్రాణాలతో బయటపడింది.

Girl surviving plane crash:

ప్రమాదంలో తీవ్రంగా గాయపడ్డ లానీని గ్రాండ్ రేపిడ్స్​లోని మేరీ ఫ్రీబెడ్ పునరావాస ఆస్పత్రికి తరలించారు. చికిత్స అందించిన వైద్యులు బాలిక కోలుకునేందుకు సహకరించారు. తొలుత లానీ నడవలేకపోయిందని, వీల్ ఛైర్​లోనే తిప్పామని వైద్యులు తెలిపారు. ఇప్పుడు చేతి కర్రల సాయంతో నడుస్తోందని చెప్పారు.

US news Telugu:

మిషిగన్, న్యూయార్క్, మిన్నెసొటా నుంచి లానీకి గ్రీటింగ్ లెటర్లు వస్తున్నాయని బాలిక తల్లి క్రిస్టీ పెర్డూ చెప్పారు. త్వరగా కోలుకోవాలని అనేక మంది విద్యార్థులు లేఖలు పంపించారని తెలిపారు. ప్రమాదం నుంచి ఆమె బయటపడటం ఓ అద్భుతమని చెబుతున్నారు.

ప్రమాదం సమయంలో తన తండ్రి చాకచక్యంగా వ్యవహరించి కాపాడటం వల్లే లానీ జీవించి ఉందని కుటుంబ సభ్యులు భావిస్తున్నారు. ప్రమాదానికి గురైన విమానంలో మొత్తం ఐదుగురు ప్రయాణిస్తున్నారు. పైలట్ సైతం ఘటనలో ప్రాణాలు కోల్పోయారు. ఈ ఘటనపై ఫెడరల్ ఏజెన్సీ దర్యాప్తు చేపట్టింది.

ఇదీ చదవండి:కుప్పకూలిన విమానం.. 'పాప్​స్టార్'​ దుర్మరణం