అమెరికాలో లాక్డౌన్ వేళ క్వారంటైన్లో ఒంటరితనాన్ని అనుభవిస్తున్న బామ్మ కోసం.. 220మైళ్ల దూరాన్ని ఏడురోజుల్లో పూర్తి చేశాడో మనవడు.
వాషింగ్టటన్కు చెందిన రన్నర్ కొరే క్యాపెలోనికి.. బామ్మ రూత్ ఆండ్రోస్ అంటే చాలా ఇష్టం. చిన్నప్పటి నుంచి తల్లిలా చూసుకున్న బామ్మను 'నానా' అంటూ ముద్దుగా పిలిచేవాడు. క్యాపెలోనికి అన్నింట తోడుంటూ.. ప్రేమను పంచింది రూత్. అయితే, క్యాపెలోని కుటుంబం వాషింగ్టన్లో స్థిరపడగా, బామ్మ రూత్ మాత్రం పెన్సిల్వేనియాలోని స్వస్థలం స్క్రాంటన్లోనే ఉండిపోయింది.
మనవడి ప్రేమకు సలాం...
98ఏళ్ల రూత్కు కొద్దిరోజుల క్రితం కరోనా సోకింది. దీంతో రూత్ను పూర్తిగా ఆసుపత్రిలోనే ఉంచి వైద్యం అందించారు. తక్కువ సమయంలోనే కరోనాను జయించింది రూత్. ఆ తర్వాత ఆసుపత్రిలోనే కొద్దిరోజులు క్వారంటైన్లో ఉండమన్నారు వైద్యులు. చాలా రోజులుగా ఆసుపత్రి గోడల మధ్యే ఉంటున్న రూత్.. క్యాపెలోనీకి ఫోన్ చేసి, వారిని చూడకుండానే తనకేమైనా అవుతుందేమోనని బాధపడేది.
పరుగు.. పరుగున..
బామ్మ వేదనను అర్థం చేసుకున్న క్యాపెలోని.. వాషింగ్టన్లోని తన ఇంటి నుంచి పరుగు మొదలెట్టాడు. ఏడు రోజుల పాటు ఏడు మ్యారథాన్లు పూర్తి చేసి... పెన్సిల్వేనియాలోని స్క్రాంటన్లో బామ్మ రూత్ ఆండ్రస్ ఉన్న నర్సింగ్ హోమ్ దగ్గర ఆగాడు. నాలుగో అంతస్తులో ఉన్న నానాకు ఫోన్ చేసి, కిందికి చూడమన్నాడు. కిటీకీలోంచి మనవడిని చూసిన ఆ బామ్మ కళ్లు చెమర్చాయి. అక్కడున్నవారంతా 'నానా ఐ లవ్ యూ' అంటూంటే మురిసిపోయింది రూత్.
బామ్మ కోసం.. 220 మైళ్లు పరిగెత్తిన మనవడు! "నేను లాక్డౌన్లో బామ్మతో ఫోన్లో మాట్లాడుతున్నప్పుడు.. నాకు అర్థమైంది. బామ్మ బాగా భయపడుతోంది. ఆమె మమ్మల్ని ఇక చూడలేదేమోనని బాధపడేది. ఆమె భయాన్ని పోగొట్టడానికి ఏదో ఒకటి చేయాలని నేను అనుకున్నా. అప్పడు నా గర్లఫ్రండ్ సుశాన్ కమేనర్ నాకు ఈ ఉపాయమిచ్చింది. నేనిప్పటి వరకు పాల్గొన్న రేసుల్లో అతిపొడవైన రేసు సహారా ఎడారిలో 156మైళ్ల పందెం. కానీ, బామ్మ 220మైళ్ల దూరంలో ఉంది.. అంత దూరం మారథాన్ చేయడానికి ముందు భయపడ్డాను. అయితే మన కోసం వారి జీవితాలే త్యాగం చేసి మనల్ని పెద్ద చేసినవారికి, ఈ వయసులో కాసింత సంతోషాన్నివ్వాలని నిర్ణయించుకున్నా."
-కొరే క్యాపెలోని, రన్నర్
'రూత్ ఛాలెంజ్' నినాదంతో 7 మారథాన్లు పరిగెత్తి, బామ్మను కలిసిన క్యాపెలోనికి సామాజిక మాధ్యమాల్లో ఫాలోవర్లు విపరీతంగా పెరిగిపోయారు. బామ్మ ఆరోగ్యంగా ఇల్లు చేరాలని కోరుకుంటూ.. ఎందరో విరాళాలు పంపారు. దీంతో నానా పేరిట దాదాపు 24వేల అమెరికన్ డాలర్లు పోగయ్యాయి.
ఇదీ చదవండి: ప్రత్యేక హెలికాప్టర్లో గొరిల్లా.. కారణమేంటంటే?
