వెనెజువెలా ఎన్నికల్లో నికోలస్​ మదురో విజయం!

వెనెజువెలాలో జరిగిన ఎన్నికల్లో తమ కూటమి భారీ విజయం సాధించిందని ఆ దేశ అధ్యక్షుడు నికోలస్​ మదురో ప్రకటించుకున్నారు. అయితే ఈ ఎన్నికలను విపక్ష పార్టీలు బహిష్కరించాయి. అంతర్జాతీయంగా కూడా మదురో ఎన్నికపై విమర్శలు వ్యక్తం అవుతున్నాయి.

వెనెజువెలా కాంగ్రెస్​కు జరిగిన ఎన్నికల్లో అఖండ విజయం సాధించినట్లు ఆ దేశ అధ్యక్షుడు నికోలస్ మదురో రాజకీయ కూటమి ప్రకటించుకుంది. మదురోకు చెందిన యూనైటెడ్ సోషలిస్ట్ పార్టీ ఆఫ్ వెనుజువెలా సహా కూటమి పార్టీలన్నీ కలిసి ఎన్నికల్లో 67 శాతం ఓట్లు కైవసం చేసుకున్నట్లు తెెలుస్తోంది.

అయితే ఈ ఎన్నికలను ప్రధాన విపక్ష పార్టీలన్నీ బహిష్కరించాయి. ఫలితాలను గుర్తించేది లేదని స్పష్టం చేశాయి. మరోవైపు ఈ ఎన్నికలు మోసపూరితంగా ఉన్నాయని అంతర్జాతీయంగానూ విమర్శలు వ్యక్తమవుతున్నాయి.

వెనెజువెలా జాతీయ అసెంబ్లీలో.. అమెరికా మద్దతు ఉన్న జువాన్ గువాయిడ్​కు ఇప్పటివరకు ఆధిక్యం ఉంది. కాంగ్రెస్​లో ఉన్న అధికారాన్ని బట్టి గువాయిడే వెనెజువెలా పాలకుడు అని అమెరికా సహా పలు కీలక దేశాలు గుర్తిస్తున్నాయి. అయితే తాజా ఫలితాలు ఆయనకు వ్యతిరేకంగా ఉన్నాయి. మదురో విజయంతో విపక్ష నేతగా ఆయన స్థానం మరింత బలహీనంగా మారే అవకాశం ఉంది.