ట్రంప్​పై అభిశంసనకు ప్రతినిధుల సభ ఆమోదం

03:02 January 14

ట్రంప్​పై అభిశంసన తీర్మానానికి ప్రతినిధుల సభలో ఆమోదం లభించింది. 232-197 ఓట్ల తేడాతో  తీర్మానం నెగ్గింది. ట్రంప్​ సొంత పార్టీ రిపబ్లికన్​కు చెందిన 10 మంది సభ్యులు తీర్మానానికి మద్దతు తెలిపారు.

ప్రతినిధుల సభలో తీర్మానం ఆమోదంతో రెండు సార్లు అభిశంసనను ఎదుర్కొన్న తొలి అమెరికా అధ్యక్షుడిగా చరిత్రలో నిలిచిపోనున్నారు ట్రంప్​. ట్రంప్​ను పదవి నుంచి తొలగించాలంటే ఈ తీర్మానం అమెరికా ఎగువ సభ సెనేట్​లో కూడా ఆమోదం పొందాల్సి ఉంది. అక్కడ రిపబ్లికన్ల​ మెజారిటీ ఉన్నందున ఆమోదం లభించే అవకాశాలు తక్కువే.

02:52 January 14

ఓటింగ్ ప్రారంభం..

ప్రతినిధుల సభలో ట్రంప్​పై డెమొక్రాట్లు ప్రవేశపెట్టిన అభిశంసన తీర్మానంపై ఓటింగ్​ జరుగుతోంది. క్యాపిటల్​ భవనంలో జనవరి 7న చెలరేగిన హింసకు ట్రంపే కారణమని అందరికీ తెలుసని, ఆయన పదవిలో కొనసాగడానికి వీల్లేదని తీర్మానంపై చర్చ సందర్భంగా స్పీకర్ పెలోసీ అన్నారు.

ట్రంప్​పై అభిశంసన తీర్మానానికి మద్దతుగా ఓటు వేస్తామని ఆయన సొంత పార్టీ రిపబ్లికన్​కు చెందిన ఏడుగురు సభ్యులు తెలిపారు.

20:38 January 13

ట్రంప్​పై అభిశంసనకు ప్రతినిధుల సభ ఆమోదం

క్యాపిటల్​ హింసాకాండకు కారణమయ్యారంటూ అమెరికా అధ్యక్షుడు డొనాల్డ్​ ట్రంప్​పై ప్రతినిధుల సభలో డెమొక్రాట్లు అభిశంసన అస్త్రాన్ని ప్రయోగించారు. 

215మంది డెమొక్రాట్లు, 5మంది రిపబ్లికన్లు అభిశంసనకు అనుకూలంగా ఉన్నట్లు అగ్రరాజ్యంలోని ప్రముఖ వార్తా సంస్థ వెల్లడించింది. 

అభిశంసించాలంటే 218 ఓట్లు ఉంటే సరిపోతుంది. డెమొక్రాట్ల ఆధిపత్యం ఉన్న ప్రతినిధుల సభలో అభిశంసన దాదాపు గట్టెక్కే అవకాశాలున్నాయి. అనంతరం సెనేట్​కు పంపనున్నారు.