ల్యాబ్లో అభివృద్ధి చేసిన చిన్నపాటి మానవ అవయవాలు.. కొవిడ్-19 వ్యాక్సిన్ అభివృద్ధిలో కీలకపాత్ర పోషిస్తాయని తెలిపారు శాస్త్రవేత్తలు. వీటిపై చేసే పరిశోధనల ఫలితాలతో కరోనా వైరస్కు కొత్త తరహా చికిత్సను కనుగొనవచ్చని అభిప్రాయపడ్డారు.
ల్యాబ్లో అభివృద్ధి చేసే అవయవాలకు ఆర్గనాయిడ్స్ అని పేరు. ఇవి మనిషికి వ్యాధి సోకినప్పుడు ఉండే కణజాలాలను పోలి ఉంటాయి.
కరోనా వైరస్ ఎలా వ్యాప్తిచెందుతుందో అర్థం చేసుకోవడానికి ఈ అవయవాలపై పరిశోధనలు జరుపుతున్నారు శాస్త్రవేత్తలు. ఈ విషయాన్ని కెనడాలోని బ్రిటీష్ కొలంబియా విశ్వవిద్యాలయంలోని లైఫ్ సైన్స్ ఇన్స్టిట్యూట్ డైరెక్టర్ జోసెఫ్ పెన్నిన్జెర్ తెలిపారు. మనిషి శరీరంలో ఉండే స్టెమ్ సెల్స్ నుంచి అభివృద్ధి చేసిన ఈ అవయవాల్లో.. మనిషిలో ఉన్న కణాల్లాగే, కొన్ని కణాలు ఉంటాయని పేర్కొన్నారు.
జికా వైరస్ను అర్థం చేసుకోవడానికి శాస్త్రవేత్తలకు ఈ అవయవాలు ఎంతో ఉపయోగపడ్డాయి. తాజాగా కరోనా వైరస్పైనా ఇవి ఉపయోగకరంగా ఉంటాయని వారు భావిస్తున్నారు. ఈ ఆర్గనాయిడ్స్ సహాయంతో శాస్త్రవేత్తలు వైరస్ను అర్థం చేసుకునే తీరు మారుతుందని అమెరికాలోని కార్నాల్ విశ్వవిద్యాలయంలోని స్టెమ్ సెల్ బయాలజిస్ట్ షూయిబింగ్ చెన్ తెలిపారు.
"అంటు వ్యాధులపై పరిశోధనలు చేయడానికి కోతి మూత్రపిండాల నుంచి కణాల(వెరో సెల్స్,కోలోన్ క్యాన్సర్ సెల్స్)ను తీసుకుంటారు. అయితే ఇవి మనిషిలో ఏం జరుగుతుందనే దాన్ని స్పష్టంగా చెప్పలేవు. సార్స్-సీఓవీ2 గురించి ఎలుకపై కొందరు శాస్త్రవేత్తలు పరిశోధనలు చేస్తున్నారు. అయితే మనిషిలోకి సార్స్-సీఓవీ2 ప్రవేశించడానికి కావాల్సిన రిసెప్టర్ వీటిలో ఉండవు. ఇలాంటి పరిమితులను అధిగమించడానికి ఆర్గనాయిడ్స్ సహాయపడతాయి. వైరస్ను శాస్త్రవేత్తలు అర్థం చేసుకునే తీరును ఇవి మార్చగలుగుతాయి. ఫలితంగా కొత్త చికిత్సలు ఉత్పన్నమవుతాయి."
--- షూయిబింగ్ చెన్, కార్నాల్ విశ్వవిద్యాలయం
ఈ ఆర్గనాయిడ్పై చేపట్టిన ప్రయోగాల ద్వారా.. పేగులోని బయట పొరలో ఉన్న ఏ కణాలకు వైరస్ సోకుతుందో గుర్తించవచ్చని ఈ అధ్యయనం సహ రచయిత జోప్ బ్యూమర్ తెలిపారు.
