అమెరికా హ్యూస్టన్లో భారతీయ అమెరికన్లు, పాకిస్థాన్కు వ్యతిరేకంగా నిరసన చేపట్టారు. పాక్ ఉగ్రవాదాన్ని పెంచిపోషిస్తోందని, అల్పసంఖ్యాక వర్గాల వారిని వేధింపులకు గురిచేస్తోందని ఆవేదన వ్యక్తం చేశారు. పాకిస్థాన్ ఆగడాలను తెలిపే విధంగా ప్లకార్డులు ప్రదర్శించారు. ప్రపంచ దేశాలు, పౌర సమాజం పాకిస్థాన్ దురాగతాలను ప్రశ్నించాలని విన్నవించారు.
హ్యూస్టన్లో ఇండియా సొసైటీ ఇంటర్నేషనల్, గ్లోబల్ కశ్మీరీ పండిట్ డైయాస్పొరా సంస్థల ఆధ్వర్యంలో సుమారు 300 మంది భారతీయ అమెరికన్లు నిరసన కార్యక్రమంలో పాల్గొన్నారు.
పాకిస్థాన్ తన భూభాగంలో ఉగ్రవాద సంస్థలను పెంచి పోషిస్తోందని విమర్శించారు. కశ్మీర్లో అల్పసంఖ్యాకులుగా ఉన్న కశ్మీరీ పండిట్లకు రక్షణ లేకుండా పోయిందని, వారిని వేధింపులకు గురిచేస్తున్నారని ఆవేదన వ్యక్తం చేశారు.
కశ్మీర్లోని హిందువులను, సిక్కులను నిర్మూలనకు పాకిస్థాన్ జాతి విద్వేషపూరిత దాడులకు పాల్పడుతోందని ఆరోపించారు. ఫలితంగా సుమారు 4 లక్షల మంది దేశాన్ని విడిచి వలస వెళ్లాల్సి వచ్చిందని ఆవేదన వ్యక్తం చేశారు.
ఇదీ నేపథ్యం...
జమ్ముకశ్మీర్ పుల్వామాలో ఫిబ్రవరి 14న జైషే మహమ్మద్ జరిపిన ఉగ్రదాడిలో భారత సీఆర్పీఎఫ్ జవానులు 40 మంది అమరులయ్యారు. ప్రతీకారంగా భారత్ పాకిస్థాన్లోని బాలాకోట్లోని జైష్ ఉగ్రవాద స్థావరాలపై దాడిచేసి నాశనం చేసింది. ప్రతిగా పాక్ భారత భూభాగంపై వైమానిక దాడికి పాల్పడింది. దీనిని భారత్ సమర్థవంతంగా తిప్పికొట్టింది. ఈ సమయంలో భారత పైలెట్ అభినందన్ పాక్ ఎఫ్-16 యుద్ధ విమానాన్ని కూల్చివేశారు. అనంతరం తన మిగ్ యుద్ధ విమానాన్ని కోల్పోయి పాక్ చెరలో చిక్కారు. భారత్ దౌత్యం, అంతర్జాతీయ ఒత్తిడితో పాక్ వింగ్ కమాండర్ అభినందన్ను విడిచిపెట్టింది. అయినా నియంత్రణ రేఖ వెంబడి కాల్పుల విరమణ ఒప్పందాన్ని పాక్ ఉల్లంఘిస్తూనే ఉంది. ఈ నేపథ్యంలో ఇరుదేశాల మధ్య ఉద్రిక్తతలు ఇంకా కొనసాగుతూనే ఉన్నాయి.
