'భారత్​కు శాశ్వత సభ్యత్వం ఇచ్చితీరాల్సిందే'

ఐక్యరాజ్యసమితి భద్రతా మండలిని విస్తరించాలని, అందులో భారత్​, జర్మనీ, బ్రెజిల్​, జపాన్​లకు కచ్చితంగా శాశ్వత సభ్య దేశాల హోదా కల్పించాలని ఫ్రాన్స్ అభిప్రాయపడింది. ఆఫ్రికా దేశాలకూ సమప్రాధాన్యం ఇవ్వాల్సిన అవసరముందని పేర్కొంది.

ఐక్యరాజ్యసమితి భద్రతామండలిలో భారత్​కు శాశ్వత సభ్యదేశంగా చోటు కల్పించాల్సిన ఆవశ్యకత ఉందని ఫ్రాన్స్​ అభిప్రాయపడింది. భారత్​తో పాటు జర్మనీ, బ్రెజిల్​, జపాన్​లకూ శాశ్వత సభ్యదేశాల హోదా కల్పించాల్సిన అవసరముందని తెలిపింది.

ప్రపంచ దేశాలకు తగిన ప్రాతినిధ్యం లభించాలంటే భద్రతా మండలిలో సంస్కరణలు తీసుకురావాల్సిన అవసరం ఉందని, ఐరాసలో ఫ్రాన్​ శాశ్వత ప్రతినిధి ఫ్రానోయిస్​ డెలాట్రే స్పష్టం చేశారు.

సమకాలీన పరిస్థితులను దృష్టిలో ఉంచుకుని ఐరాస భద్రతా మండలి పరిధిని విస్తరించాల్సిన అవసరముందని ఫ్రాన్స్​ అభిప్రాయపడింది.

"తాజా పరిస్థితుల్లో భారత్​, జర్మనీ, బ్రెజిల్​, జపాన్​, ఆఫ్రికా దేశాలకు తగిన ప్రాతినిధ్యం కల్పించాల్సిన అవసరం కచ్చితంగా ఉంది. ఈ అంశం ఫ్రాన్స్ వ్యూహాత్మక విధానాల్లో అత్యంత ప్రాధాన్య అంశం." - డెలాట్రే, ఐరాసలో ఫ్రాన్స్ శాస్వత ప్రతినిధి

భారత్​ కృషి...

ఐరాస భద్రతామండలిలో సంస్కరణలు చేపట్టాలని భారత్​ సుదీర్ఘకాలంగా కృషిచేస్తోంది. ఈ సంవత్సరం ప్రారంభంలో జరిగిన సమావేశంలో, మండలిలో సమాన ప్రాతినిధ్యం అనే అంశాన్ని ఐరాస భారత ప్రతినిధి అక్బరుద్దీన్ ప్రస్తావించారు. మండలి విస్తరణకు 113 సభ్యదేశాలు సుముఖంగా ఉన్నట్లు ఆయన తెలిపారు. ఇప్పుడు యూఎన్ శాశ్వత సభ్యదేశంగా భారత్​కు అన్ని అర్హతలు ఉన్నాయని ఫ్రాన్స్ కూడా​ నొక్కిచెప్పింది.

భవిష్యత్తు కోసం...

భవిష్యత్​లో ప్రపంచదేశాలను సమన్వయం చేయడంలో ఐరాస పాత్ర మరింత పటిష్ఠం చేయడానికి ఫ్రాన్స్​, జర్మనీ కలిసి పనిచేస్తున్నాయని డెలాట్రే అన్నారు. ఇందుకు భద్రతా మండలిలో తగిన మార్పులు తీసుకురావడం కోసం కృషి చేస్తున్నట్లు ఆయన తెలిపారు.

ఇదీ చూడండి: ప్రకృతి కోసం మోదీతో ఒబామా దోస్తానా..!