అమెరికాలో జోరుగా ముందస్తు ఓటింగ్​

అమెరికా ఫ్లోరిడాలో ముందస్తు ఓటింగ్​ జోరుగా సాగుతోంది. వర్షాన్ని కూడా లెక్క చేయకుండా ప్రజలు పోలింగ్​ కేంద్రాల వద్ద బారులు తీరారు. ఓటు వేయడానికి 15 నిమిషాల నుంచి గంటన్నర వరకు సమయం పడుతోంది. ఈ రాష్ట్రంలో గెలవడం అధ్యక్షుడు ట్రంప్​నకు ఎంతో అవసరం.

అమెరికా అధ్యక్ష ఎన్నికల్లో ముందస్తు పోలింగ్​ జోరుగా సాగుతోంది. అనేక రాష్ట్రాల్లో ఈ ప్రక్రియ ఇప్పటికే మొదలవ్వగా.. తాజాగా ఈ జాబితాలోకి ఫ్లోరిడా చేరింది. నవంబర్​ 3న అధ్యక్ష ఎన్నికలు జరగనుండగా.. ముందుగానే ఓట్లు వేసేందుకు ఫ్లోరిడా వాసులు పోలింగ్​ కేంద్రాల వద్ద బారులు తీరారు. కొన్ని కౌంటీల్లో ఓటు వేసేందుకు 15 నిమిషాల సమయం పడుతుండగా.. మరికొన్నిటిలో ఓటర్లు దాదాపు గంటన్నార పాటు లైన్లల్లో వేచి ఉంటున్న దృశ్యాలు కెమెరాకు చిక్కాయి.

మూడు గంటల నిరీక్షణ...

పామ్​ బీచ్​ కౌంటీ ప్రాంతంలో వర్షాలు భారీగా కురుస్తున్నాయి. ఈదురు గాలులు కూడా బలంగా వీస్తున్నాయి. ఈ పరిస్థితుల్లోనూ ప్రజలు ఓటు వేసేందుకు ముందుకొచ్చారు. మూడు గంటల పాటు లైన్లల్లో నిలబడి ఓటు హక్కును వినియోగించుకున్నారు.

ఇదీ చూడండి-అధ్యక్ష ఎన్నికలు: ముందస్తు పోలింగ్​ అంటే?

ట్రంప్​ గెలవాల్సిందే!

ఎన్నికలు దగ్గరపడుతున్న కొద్ది.. అధ్యక్ష అభ్యర్థుల మధ్య పోటీ హోరాహోరీగా సాగుతోంది. ఫ్లోరిడా రాష్ట్రం ఇరువురికి కీలకమే. అయితే గతేడాది తన అధికార నివాసాన్ని పామ్​ బీచ్​ ఎస్టేట్​కు మార్చారు ట్రంప్​. అదే సమయంలో రాష్ట్రంలో పైచేయి సాధించడం ట్రంప్​నకు ఎంతో అవసరం. లేకపోతే జో బైడెన్​ను ఓడించి మరోమారు శ్వేతసౌధంలో అడుగుపెట్టే అవకాశం ట్రంప్​నకు దాదాపు అసాధ్యమే.

ఇదీ చూడండి-ఫౌచీ మాటలు విని ప్రజలు విసిగిపోయారు: ట్రంప్​