అమెరికా ఎన్నికల ఫలితాలను స్వాగతించిన జుకర్​బర్గ్

అమెరికా అధ్యక్ష ఎన్నికల్లో జో బైడెన్ విజయాన్ని ఫేస్​బుక్ సీఈఓ మార్క్ జుకర్​బర్గ్ స్వాగతించినట్లు ఓ వార్తా సంస్థ పేర్కొంది. తమ సంస్థలోని ఉద్యోగులతో జరిగిన సమావేశంలో ఈ మేరకు పేర్కొన్నట్లు తెలిపింది. రీకౌంటింగ్ చేపట్టినా పెద్దగా ప్రయోజనం లేదని జుకర్​బర్గ్ అభిప్రాయపడ్డట్లు వెల్లడించింది.

అమెరికా అధ్యక్ష ఎన్నికల ఫలితాలను ఫేస్​బుక్ సీఈఓ మార్క్ జుకర్​బర్గ్ స్వాగతించినట్లు ఓ మీడియా సంస్థ వెల్లడించింది. జో బైడెన్​ను అమెరికా తదుపరి అధ్యక్షుడిగా అంగీకరించిన తొలి దిగ్గజ సాంకేతిక సంస్థ అధిపతిగా నిలిచారని పేర్కొంది.

నవంబర్ 3న జరిగిన ఎన్నికల్లో బైడెన్ విజయం సాధించిన విషయం స్పష్టమైందని జుకర్​బర్గ్ తన సంస్థలోని ఉద్యోగులకు చెప్పారని బజ్​ఫీడ్ అనే వార్తా సంస్థ పేర్కొంది.

"ఎన్నికల ఫలితం ఇప్పుడు స్పష్టంగా ఉంది. జో బైడెన్ మన తదుపరి అధ్యక్షుడు కాబోతున్నారు. ఎన్నికలు ప్రాథమికంగా సవ్యంగానే జరిగాయని ప్రజలు విశ్వసించడం ముఖ్యం. ట్రంప్​కు ఓటేసిన కోట్లాది మంది ప్రజలకూ ఇదే వర్తిస్తుంది."

-మార్క్ జుకర్​బర్గ్, ఫేస్​బుక్ సీఈఓ

ఎన్నికల ఫలితాలపై కొంత మంది న్యాయపోరాటానికి మొగ్గుచూపుతున్నారని, రీకౌంటింగ్​ చేయాలని డిమాండ్ చేస్తున్నారని జుకర్​బర్గ్ పేర్కొన్నారు. ఇది వారి హక్కు అని చెప్పారు. అయితే రీకౌంటింగ్​తో పెద్దగా ఉపయోగం లేదని అన్నారు. 'ముందస్తు అంచనాలకు భిన్నంగా ఎన్నికల ఫలితాలు ఉంటాయని కొంతమంది అనుకుంటున్నారు. వారి ప్రయత్నాలు పెద్దగా ప్రభావం చూపించకపోవచ్చ'ని పేర్కొన్నారు. ఎన్నికలపై తప్పుడు వార్తలను ట్రంప్ షేర్ చేయడాన్ని వ్యతిరేకించారు.

ఇదీ చదవండి-డెంగీ, మలేరియా చికిత్సలకు బీమా పాలసీలు