భూగ్రహం అంతం కానుందని ఎన్నో ఏళ్లుగా ప్రచారం నడుస్తోంది. యుగాంతం పేరిట ఇప్పటివరకు ఎన్నో తేదీలు చక్కర్లు కొట్టాయి. అయితే భూమి వినాశనం అయ్యేది 2068లోనే అంటూ తాజాగా మరో వార్త బయటకు వచ్చింది. దీనంతటికి కారణం ఆ సంవత్సరంలోనే భూమిని ఓ గ్రహశకలం ఢీకొట్టనుందని హవాయి విశ్వవిద్యాలయానికి చెందిన శాస్త్రవేత్తలు చెప్పటం.
ఆ ఆస్టరాయిడ్కు ఈజిప్టు దేవుడు ఖోస్ పేరును సూచించేలా 'అపోఫిస్' అని నామకరణం చేశారు. భూమికి అతిదగ్గరగా వస్తున్న రెండో గ్రహశకలం ఇదేనట.
మరో తొమ్మిదేళ్లలోనే...
అపోఫిస్ను 2004లోనే గుర్తించారు శాస్త్రవేత్తలు. వివిధ అబ్జర్వేటరీలు, ప్రసిద్ధ సుబారు టెలిస్కోప్ సహాయంతో ఖగోళ శాస్త్రవేత్తలు 2029, ఏప్రిల్ 13న నాటికి ఇది భూమికి అత్యంత సమీపంగా వస్తుందని అంచనా వేశారు. అందుకే దీనిని ప్రమాదకర గ్రహశకలంగా పరిగణిస్తున్నారు. 2029లో ఇది భూమికి 400 మీటర్ల దగ్గర వరకు వచ్చినా.. ఢీకొట్టకపోవచ్చని అంచనా వేస్తున్నారు. అయితే ఆ సమయంలో అట్లాంటిక్ మహాసముద్రం మీదుగా అమెరికాను దాటుతుందని.. అది ప్రజలంతా చూడవచ్చని నాసా చెప్పింది. దాదాపు 1,120 అడుగుల వైడల్పులో ఉంటుందట. అంటే సుమారు మూడున్నర ఫుట్బాల్ మైదానాల పరిమాణమంత.
2068లో మాత్రం పక్కా..!
అపోఫిస్ 2029లో మిస్ అయినా 2068లో మాత్రం భూమిని తాకొచ్చని భావిస్తున్నారు శాస్త్రవేత్తలు. యార్కోవ్స్కీ అనే ఎఫెక్ట్ కారణంగానే ఇలా జరిగే ప్రమాదం ఉందని అంచనా వేస్తున్నారు.
