డెమొక్రాట్లదే అమెరికా ప్రతినిధుల సభ.. కానీ

అమెరికా అధ్యక్ష ఎన్నికలతో పాటు ప్రతినిధుల సభకు కూడా ఈసారి పోలింగ్​ జరిగింది. ఇప్పటివరకు వెలువడిన ఫలితాల్లో.. 218 స్థానాలు కైవసం చేసుకున్న డెమొక్రటిక్​ పార్టీ.. సభలో తన ఆధిపత్యాన్ని మరోమారు నిలబెట్టుకుంది. అయితే ఎన్నికల ముందు ఉన్న 232 సీట్లు మాత్రం దక్కేలా కనిపించడం లేదు. రిపబ్లికన్లు అనూహ్యంగా పుంజుకుని షాక్​ ఇచ్చారు. అటు సెనేట్​లోనూ వారిదే పైచేయి. ఈ పరిణామాలు జో బైడెన్​ వర్గాన్ని ఇరకాటంలో పెట్టేవేనని రాజకీయ విశ్లేషకులు భావిస్తున్నారు.

అధ్యక్ష ఎన్నికల్లో జో బైడెన్​ గెలవడంపై డెమొక్రాట్లు ఆనందంలో మునిగితేలుతున్నారు. అయితే 'ప్రతినిధుల సభ' రూపంలో వారికి కొత్త సమస్య వచ్చిపడింది. ఈసారైనా సెనేట్​లో జెండా ఎగరవేయాలనుకున్న వారి ఆశలపై నీరుగారడం సహా ప్రతినిధుల సభలో తమ ఆధిపత్యానికే ఎసరొచ్చిపడింది.

మెజారిటీ తగ్గింది...

అధ్యక్ష ఎన్నికలతో పాటు.. 435 సీట్లున్న అమెరికా ప్రతినిధుల సభకు పోలింగ్​ జరిగింది. ఇప్పటికే 218 స్థానాలు దక్కించుకున్న డెమొక్రాట్లు మరో రెండేళ్లపాటు ప్రతినిధుల సభలో పైచేయి సంపాదించుకున్నారు. అయితే ఓట్ల లెక్కింపు కొనసాగుతున్నప్పటికీ.. ప్రస్తుతమున్న 232 సీట్లు దక్కకపోవచ్చని ఫలితాలను చూస్తుంటే స్పష్టంగా అర్థమవుతోంది. రిపబ్లికన్లు అనూహ్యంగా పుంజుకోవడం బైడెన్​ వర్గాన్ని దెబ్బకొట్టింది. కనీసం 15స్థానాల్లో ఓటమిపాలయ్యే అవకాశం లేకపోలేదు. ప్రస్తుత డెమొక్రాట్​ చట్టసభ్యుల్లో కనీసం ఏడుగురు ఓడిపోవడం పార్టీని కలవరపెడుతోంది.

ఇదీ చూడండి:-అధ్యక్షుడిగా బైడెన్​ తొలి సంతకం దేనిపై?

ఆధిక్యం తక్కువగా ఉంటే బిల్లుల ఆమోదం విషయంలో ప్రతినిధుల సభ స్పీకర్​ నాన్సీ పెలోసీ(డెమొక్రాట్​)కు తలనొప్పి తప్పదు.

సెనేట్​లోనూ..

రిపబ్లికన్లు సెనేట్​లో తమ పట్టును కొనసాగించనున్నారు. అధ్యక్షుడిగా ట్రంప్​ ఓడినప్పటికీ ఇరు సభల్లో తమ అభ్యర్థులను గెలిపించుకోగలిగింది రిపబ్లికన్​ పార్టీ.

ఈ పరిణామాలు బైడెన్​ వర్గానికి కష్టమైన విషయమే. కీలకమైన బిల్లుల ఆమోదానికి ఇబ్బందులు ఏర్పడక తప్పవని రాజకీయ విశ్లేషకులు భావిస్తున్నారు.

ఇదీ చూడండి:-ఓడింది ట్రంప్​ మాత్రమే.. 'ట్రంపిజం' కాదు!