అమెరికా సభలో ట్రంప్పై అభిశంసన తీర్మానం అమెరికా రాజకీయాల్లో మరో వివాదం చెలరేగింది. అమెరికా అధ్యక్షుడు డొనాల్డ్ ట్రంప్ను గద్దె దించేందుకు ప్రతినిధుల సభలో అభిశంసన తీర్మానాన్ని ప్రవేశపెట్టారు డెమొక్రాట్లు.
ప్రత్యర్థి, డెమొక్రాట్ అభ్యర్థి జో బైడెన్కు నష్టం కలిగించేందుకు విదేశీ శక్తులను ట్రంప్ ఆశ్రయించారని ఆయనపై ఆరోపణలు వచ్చాయి. ఈ నేపథ్యంలో అధికారికంగా విచారణ ప్రారంభించామని సభ స్పీకర్ నాన్సీ పెలోసీ ప్రకటించారు.
"ప్రతినిధుల సభలో అధికారికంగా అభిశంసన తీర్మానాన్ని ప్రవేశపెడుతున్నట్లు ప్రకటిస్తున్నా. సభకు చెందిన ఆరుగురు సభ్యుల కమిటీ అభిశంసన తీర్మానాన్ని విచారించాలని ఆదేశిస్తున్నా. అధ్యక్షుడు జవాబుదారీగా వ్యవహరించాలి. చట్టానికి ఎవరూ అతీతులు కారు."
-నాన్సీ పెలోసీ, ప్రతినిధుల సభ స్పీకర్
ట్రంప్పై వచ్చిన ఆరోపణలు
జో బైడెన్ను రాజకీయంగా ఎదుర్కోవడంపై ఉక్రెయిన్ అధ్యక్షుడు వ్లోదిమిర్ జెలెంస్కీతో గతంలో ట్రంప్ మాట్లాడారని ఓ ప్రజావేగు సంస్థ ఫిర్యాదు చేసింది. అందులోని కొన్ని అంశాలు...
⦁ అమెరికా అధ్యక్షుడు డొనాల్డ్ ట్రంప్, ఉక్రెయిన్ అధ్యక్షుడు వ్లోదిమిర్ జెలెంస్కీ ఈ ఏడాది జులై 25న ఫోన్లో మాట్లాడారు.
⦁ జో బైడెన్, ఆయన కుమారుడు హంటర్ బైడెన్పై అవినీతి కేసుల్లో దర్యాప్తు చేయాలని జెలెంస్కీపై ట్రంప్ ఒత్తిడి తీసుకొచ్చారు.
⦁ ఉక్రెయిన్‌కు ఇచ్చేందుకు అమెరికా కాంగ్రెస్ ఆమోదించిన 250 మిలియన్ డాలర్ల సైనిక సాయం ఉపసంహరించుకుంటామని బెదిరించారు.
⦁ ఈ ఫోన్ కాల్‌కు దాదాపు వారం ముందు ఉక్రెయిన్‌కు సైనిక సాయం నిలిపివేయాలని ట్రంప్ తన అధికారులను ఆదేశించినట్లు వాషింగ్టన్ పోస్ట్, అమెరికా మీడియా చెప్పాయి.
ఖండించిన ట్రంప్
ఆరోపణలను ట్రంప్ ఖండించారు. జెలెంస్కీతో జో, హంటర్ విషయమై మాట్లాడింది నిజమే అయినా వారిని ఒత్తిడి చేశానన్నది మాత్రం నిరాధారమని తెలిపారు. డెమొక్రాట్ల మీడియా ఇలాంటి నకిలీ వార్తలు ప్రచారం చేయటం సహజమేనని విమర్శించారు.
"జెలెంస్కీతో నా ఫోన్ సంభాషణపై ఎలాంటి సమాచారం లేకుండా నిరాధార ఆరోపణలు చేస్తున్నారు. అది కేవలం స్నేహపూర్వకమైన.. అధికారిక సంభాషణ. ఇందులో ఒత్తిడి లేదు. జో బైడెన్, అతడి కుమారుడికి సంబంధించి ఎలాంటి ప్రతిఫలం ఆశించలేదు. ఇదంతా కూడగట్టుకుని చేస్తున్న ప్రచారం అంతే."
-డొనాల్డ్ ట్రంప్, అమెరికా అధ్యక్షుడు
జో బైడెన్ సమర్థన
కాంగ్రెస్ నిర్ణయాన్ని జోబైడెన్ సమర్థించారు. అధ్యక్షుడి హోదాలో ఉండి చట్టానికి, దేశానికి అతీతంగా పనిచేయటం తగదని అన్నారు. దేశ భద్రతకు ముప్పు వాటిల్లేలా అమెరికా వ్యవహారాల్లో విదేశీ సాయం కోసం అర్జించటం దారుణమని అభిప్రాయపడ్డారు.
"అభిశంసన.. దురదృష్టకరమైన నిర్ణయం. కానీ ఇది ట్రంప్ స్వయంకృతం. అమెరికా ఒక ప్రత్యేకమైన, భిన్నమైన దేశం. చరిత్రలో మిగతా దేశాలకంటే ఎంతో మెరుగైనది. స్వయం పరిపాలనను ప్రయోగాత్మకంగా ప్రారంభించింది మనమే. మిగతా దేశాలకు మార్గదర్శిలా వ్యవహరిస్తున్నాం. డొనాల్డ్ ట్రంప్ ఎవరో మనకు తెలుసు. ప్రపంచానికి మనమేంటో తెలియాలి."
-జో బైడెన్, డెమొక్రాట్ నేత
ప్రతినిధుల సభలో సుమారు 235 మంది డెమొక్రాట్లు అభిశంసన తీర్మానాన్ని సమర్థిస్తున్నారు. ఫలితంగా దిగువ సభలో తీర్మానం నెగ్గే అవకాశం ఉంది. అయితే అమెరికా సెనేట్లో రిపబ్లికన్లదే పైచేయి కావటం వల్ల ఎగువ సభలో తీర్మానం వీగిపోతుందని పలువురు భావిస్తున్నారు.
ఇదీ చూడండి: మోదీ భారత జాతిపిత..!: డొనాల్డ్ ట్రంప్
