అగ్రరాజ్య తదుపరి అధినేత అయ్యేందుకు జో బైడెన్ కేవలం 6 ఎలక్టోరల్ ఓట్ల దూరంలో ఉన్నారు. కీలక రాష్ట్రాలైన మిషిగన్, విస్కాన్సిన్లో గెలుపుతో ఆయన ఆధిక్యం అమాంతం పెరిగింది. ఇప్పటివరకు బైడెన్‌కు 264, ట్రంప్‌నకు 214 ఎలక్టోరల్ ఓట్లు వచ్చాయి. శ్వేతసౌధం దక్కించుకునేందుకు 270 ఓట్లు కావాలి.
ఆ రాష్ట్రాల్లో గెలుపుతో...
నిన్న సాయంత్రం వరకు ట్రంప్, బైడెన్ మధ్య పోరు హోరాహోరీగా సాగింది. అయితే బైడెన్ కీలక రాష్ట్రాలైన మిషిగన్, విస్కాన్సిన్లో గెలుపొందడం వల్ల ట్రంప్ వెనుకబడ్డారు. ఇక్కడ వరుసగా 16, 10 ఎలక్టోరల్ ఓట్లు ఉన్నాయి. అంతకుముందు బైడెన్ మరో కీలక రాష్ట్రం అరిజోనాలోనూ విజయం సాధించారు.
బైడెన్ ప్రకటన...
విజయం దాదాపు ఖరారైన తరుణంలో ఉపాధ్యక్ష అభ్యర్థి కమలా హారిస్తో కలిసి బైడెన్ మీడియాతో మాట్లాడారు. ఎన్నికల్లో గెలుపుపై విశ్వాసం వ్యక్తం చేశారు.
"సుదీర్ఘ కౌంటింగ్ అనంతరం, 270 ఎలక్టోరల్ ఓట్లు సాధించడానికి కావాల్సిన రాష్ట్రాల్లో మేం గెలుస్తున్నట్లు స్పష్టంగా కనిపిస్తోంది. అయినా మేం గెలిచాం అని చెప్పడానికి ఇక్కడికి రాలేదు. కౌంటింగ్ పూర్తయ్యేసరికి మేం గెలుస్తాం అంటున్నా.
నేను, మేము డెమొక్రాట్లుగా ఎన్నికల ప్రచారం నిర్వహించాం. కానీ గెలిచాక అమెరికా అధ్యక్షుడిగానే పాలిస్తాను. మేం గెలిచన అనంతరం రెడ్ స్టేట్స్, బ్లూ స్టేట్స్ అంటూ ఉండవు. ఉండేది ఒకటే యూనైటెడ్ స్టేట్స్ ఆఫ్ అమెరికా."
- జో బైడెన్, డెమొక్రాటిక్ అధ్యక్ష అభ్యర్థి
ట్రంప్ న్యాయపోరాటం...
కీలక రాష్ట్రాల్లో వెనుకబడ్డ డొనాల్డ్ ట్రంప్ న్యాయపోరాటానికి దిగారు. ఓట్ల లెక్కింపులో అవకతవకలు జరిగాయని ఆరోపించారు ట్రంప్. మిషిగన్ ఓటింగ్‌ సరైన విధంగా జరగలేదని ట్రంప్ దావా వేశారు. ఓట్ల లెక్కింపు చేసే చోట నిపుణులైన పరిశీలకులను నియమించాలని అందులో కోరారు. అప్పటివరకు ఆ రాష్ట్రాల్లో ఓట్ల లెక్కింపు నిలిపివేయాలన్నారు.
బైడెన్ గెలుపొందిన విస్కాన్సిన్ రాష్ట్రంలో ఓట్లను పునర్లెక్కించాలని ట్రంప్ బృందం కోరింది. ఇక్కడ ఇరువురి మధ్య పోరు నువ్వానేనా రీతిలో సాగింది. 2016లో కూడా ఈ రాష్ట్రంలో ట్రంప్ ఒక పాయింట్ కన్నా తక్కువ మార్జిన్లో ఓడిపోయారు.
