చెయ్యని నేరానికి 30 ఏళ్లు జైలు శిక్ష అనుభవించాడట!

చేయని నేరానికి దాదాపు 30ఏళ్లు జైలు శిక్ష అనుభవించాడు అమెరికాలోని ఓ వ్యక్తి. నాలుగేళ్ల చిన్నారి హత్య కేసుతో ఎలాంటి సంబంధం లేదని నిరూపించేందుకు ఇంతకాలం పట్టినందుకు అతని తరఫు న్యాయవాది విచారం వ్యక్తం చేశారు.

అమెరికా ఫిలడెల్ఫియాకు చెందిన వాల్టర్ ఒగ్రోడ్ దాదాపు 30 ఏళ్లుగా ఓ హత్యకేసులో జైలు శిక్ష అనుభవిస్తున్నాడు. ఏ నేరం చేయకపోయినా తాను నిర్దోషి అని కోర్టు ఎదుట నిరూపించుకునేందుకు అతనికి ఇన్నేళ్లు పట్టింది. హత్యానేరానికి ఒగ్రోడ్​కు ఎలాంటి సంబంధం లేదని తెలిశాక న్యాయస్థానం ఎట్టకేలకు అతనికి బెయిల్​ మంజూరు చేసింది. శుక్రవారమే జైలు నుంచి విడుదలయ్యాడు.

1988 నాటి కేసు..

ఫిలడెల్ఫియాలో 1988లో నాలుగేళ్ల చిన్నారి బార్బరా జీన్​ దారుణ హత్యకు గురయ్యింది. టీవీ బాక్స్​లో ఆమె మృతదేహన్ని ఇంటికి 1000 అడుగుల దూరంలో వదిలి వెళ్లారు దుండగులు. పక్కింటి వారి సమాచారంతో పోలీసులు కేసు నమోదు చేశారు. అప్పడు ఒగ్రోడ్ వయసు 23 ఏళ్లు. ఘటన జరిగిన నాలుగేళ్ల తర్వాత హత్యకు సంబంధముందనే అనుమానంతో ఒగ్రోడ్​ను అరెస్టు చేశారు పోలీసులు. అప్పుడు అతను బేకరీ ట్రక్​ డ్రైవర్​గా పని చేస్తున్నాడు.

ఈ కేసుపై మొదటి సారి విచారణ చేపట్టినప్పుడు ఒడ్రిగో నిజం చెప్పడం లేదని అధికారులు నివేదికలో తెలిపారు. ఆ తర్వాత 1996లో హత్యాయత్నం అభియోగంతో మరోసారి విచారణ జరిపారు. అయితే అతనికి హత్యతో సంబంధం ఉన్నట్లు ఎలాంటి ఆధారాలు లేవు.

ప్రత్యక్ష సాక్షి చెప్పిన ఆనవాళ్లకు ఒడ్రిగోకు ఎలాంటి పోలికలు లేవు. ఈ విషయాన్ని న్యాయస్థానం, అతని తరఫు న్యాయవాదులు ధ్రువీకరించారు. అనంతరం అతను నిర్దోషి అని బెయిల్ మంజూరు చేసింది ఫిలడెల్పియా న్యాయస్థానం.

నిర్దోషిగా నిరూపించేందుకు 28 ఏళ్లు పట్టినందుకు విచారం వ్యక్తం చేశారు ఒడ్రిగో తరఫు న్యాయవాది. ఈ కేసుకు సంబంధించి అతన్ని మరోసారి విచారించవద్దని కోర్టును కోరారు. చిన్నారి హత్య కేసులో మరో అనుమానితుడు ఎవరైనా ఉన్నారా అనే విషయంపై అధికారుల నుంచి ఎలాంటి సమాచారం లేదు.