అంధకారం మధ్య అధికారం కోసం కుస్తీ

వెనెజువెలాలో రాజకీయ సంక్షోభం మరింత ముదిరింది. బలాన్ని చాటిచెప్పేందుకు ప్రతిపక్ష నేత గుయాడో, అధ్యక్షుడు మదురో తీవ్రంగా శ్రమిస్తున్నారు. శనివారం ఇరు పక్షాల భారీ ర్యాలీలతో కారకస్​ రోడ్లు హోరెత్తాయి.

వెనెజువెలా రోడ్లు శనివారం కిక్కిరిశాయి. రాజకీయ సంక్షోభంలో కూరుకుపోయిన దేశంలో అధికారం చేజిక్కించుకోవడానికి ఒకరు ప్రయత్నిస్తుంటే.. అదే అధికారాన్ని నిలబెట్టుకోవడానికి మరొకరు మద్దతు కూడగట్టుకుంటున్నారు. ఇరు నేతల ర్యాలీలతో రాజధాని కారకస్​ హోరెత్తింది.

ఈ ఏడాది జనవరిలో తానే దేశాధ్యక్షుడినని ప్రకటించుకున్న ప్రతిపక్ష నేత జువాన్​ గుయాడో... మద్దతుదారులతో కారకస్ వీధుల్లో​ భారీ ర్యాలీ నిర్వహించారు. గుయాడోకు అమెరికా మద్దతునిస్తున్న సంగతి తెలిసిందే.

చట్టసభ్యుడిగా తనకు మంజూరు చేసిన భద్రతను తొలగించిన తర్వాత తొలిసారి గుయాడో ప్రజల్లోకి వచ్చారు. మదురో అధికారాన్ని వీడే వరకు ఐక్యంగా పోరాడాలని వెనెజువెలా వాసులను పిలుపునిచ్చారు.

పోటీగా మరో ర్యాలీ...

అధికారం నిలబెట్టుకునే లక్ష్యంతో ఇదే తరహా ర్యాలీ నిర్వహించారు నికోలస్​ మదురో. మద్దతుదారులతో బలప్రదర్శన చేశారు. ప్రత్యర్థులపై తీవ్రస్థాయిలో ధ్వజమెత్తారు.

సంక్షోభాల సవారీ...

వెనెజువెలా పీకల్లోతు కష్టాల్లో కూరుకుపోయింది. ఒకవైపు అధికారం కోసం నేతలు పాట్లు పడుతుంటే విద్యుత్​ కొరత, నీటి సమస్యతో ప్రజలు సతమతమవుతున్నారు. ఎన్నో రోజులుగా ప్రజలు అంధకారంలోనే జీవనం సాగిస్తున్నారు.

30 రోజుల్లో సరికొత్త విద్యుత్​ వ్యవస్థను అందుబాటులోకి తెస్తామని మదురో హామీ ఇచ్చారు.

ఇదీ చూడండి : 'షాదీ వద్దు గురూ- సోలో లైఫే సో బెటరూ'