ఆదుకుంటున్న మునుపటి కరోనా ఇన్​ఫెక్షన్లు

కరోనా వచ్చి తగ్గిందా? అయితే నిశ్చింతగా ఉండొచ్చంటున్నారు శాస్త్రవేత్తలు. ఎందుకంటే గతంలో కరోనా బారినపడి కోలుకున్నవారికి యాంటీబాడీలు రక్షణగా ఉంటున్నాయని వివిధ పరిశోధనల్లో వెల్లడైంది. ఫలితంగా కరోనా ఎన్నిరూపాలు(కొత్తరకం) మార్చినప్పటికీ వీరు నిశ్చింతంగా ఉండొచ్చంటున్నాయి పరిశోధనలు.

గతంలో వచ్చిన కరోనా వైరస్​ల వల్ల ఉత్పత్తయిన యాంటీబాడీల వల్ల కూడా ఉపయోగం ఉంటుందని శాస్త్రవేత్తలు పేర్కొన్నారు. కొవిడ్​-19 సోకిన వారికి వీటి ద్వారా ప్రయోజనం కలుగుతుందని వివరించారు. వ్యాధి లక్షణాల తీవ్రతలో వైరుధ్యాలకు కారణాలను కొంత మేర ఇవి వెల్లడి చేస్తున్నాయని చెప్పారు. అమెరికాలోని 'ట్రాన్స్​లేషనల్​ జీనోమిక్స్​ రీసెర్చ్​ ఇన్​స్టిట్యూట్'(టిజెన్​) శాస్త్రవేత్తలు ఆ పరిశోధన చేపట్టారు.

యాంటీబాడీ స్పందన..

తాజా పరిశోధనలో శాస్త్రవేత్తలు 'పెప్​సీక్​' అనే వినూత్న సాధనాన్ని ఉపయోగించారు. దీని సాయంతో.. మానవుల్లో ఇన్​ఫెక్షన్​ కలిగించే అన్ని రకాల కరోనా వైరస్​లకు మానవ యాంటీబాడీలు ఎలా స్పందిస్తాయన్నది పరిశీలించారు. తద్వారా మునుపటి కరోనా వైరస్​లకు గురైనవారిలోని యాంటీబాడీ స్పందనను.. తాజా సార్స్-కోవ్-2తో ఇన్​ఫెక్షన్​ బాధితుల్లోని స్పందనతో పోల్చి చూశారు.

కొవిడ్​ బాధితులకు రక్షణ..

పరిశోధకులు గమనించిన వాటిలో ప్రమాదకరమైన మెర్స్, సార్స్ ఉన్నాయి. వీటితోపాటు ఆల్ఫా కరోనా వైరస్​లైన 229ఈ, ఎన్​ఎల్​63, బీటా కరోనా వైరస్​లైన ఓసీ43, హెచ్​కేయూ1లు కూడా ఉన్నాయి. ఈ నాలుగు రకాల వైరస్​లు మానవుల్లో విస్తృతంగా ఉన్నాయని శాస్తవేత్తలు చెప్పారు. గతంలో వీటి బారిన పడినప్పుడు సదరు వ్యక్తిలోని రోగ నిరోధక వ్యవస్థ వెలువరించిన యాంటీబాడీలు.. తాజా సార్స్-కోవ్-2కు స్పందనగా క్రియాశీలం అవుతున్నట్లు తేల్చారు. కొవిడ్​ సోకిన కొందరిలో వ్యాధి లక్షణాలు స్వల్పంగా ఉండటానికి ఇదే కొంతమేర కారణమై ఉండొచ్చని చెప్పారు.

ఇదీ చదవండి:వారిపై కొవిడ్​ టీకా పెద్దగా ప్రభావం చూపదు!