కరోనా మరణాల రేటును తప్పుగా లెక్కిస్తున్నారా?

కరోనా ఎంత మందికి సోకింది, వారిలో ఎందరు ప్రాణాలు కోల్పోయారన్న లెక్కల ఆధారంగా ప్రస్తుతం మరణాల రేటు ఎంత ఉందో గణిస్తున్నారు. అయితే... ఈ మరణాల రేటు అధికారిక ప్రకటనల్లో చెప్పేదానికన్నా తక్కువగా ఉండొచ్చని అంటున్నారు నిపుణులు. కరోనా పరీక్షలు ఎక్కువ మందికి నిర్వహించకుండా, బాధితుల సంఖ్యను తక్కువగా చూపడమే ఇందుకు కారణమన్నది వారి వాదన.

చైనాలో పుట్టిన కరోనా మహమ్మారి అమెరికాతోపాటు ఐరోపాలో విధ్వంసం సృష్టిస్తోంది. చైనాను మించి అక్కడ రోజురోజుకు మరణాలు పెరుగుతున్నాయి. కరోనా మరణాలు రేటులో కూడా చైనాను ఈ దేశాలు దాటాయి.

చైనాలో కేసులను బట్టి వేసిన అంచనాల ప్రకారం.. కరోనా సోకిన వారిలో 80 శాతం మందికి తేలికపాటి లక్షణాలు ఉన్నట్లు తెలిపింది. వారికి ఆసుపత్రుల్లో చికిత్స చేయాల్సిన అవసరం లేదని చెప్పింది.

పరికరాల కొరతతో..

అయితే ప్రపంచవ్యాప్తంగా వ్యక్తిగత సంరక్షణ పరికరాలు, పరీక్ష కిట్లు కొరత ఉంది. ఈ పరిస్థితుల్లో వ్యాధి లక్షణాలు తీవ్రంగా ఉన్నవారిని మాత్రమే ఆసుపత్రుల్లో చేర్పించాలని సిఫార్సు చేస్తున్నారు. ఎందుకంటే మిగతా వారితో పోలిస్తే వీరి ప్రాణాలకు ముప్పు ఎక్కువ.

ఆసుపత్రుల్లో చేరిన కరోనా బాధితుల కన్నా వాస్తవానికి ప్రభావితమైనవారి సంఖ్య చాలా ఎక్కువ. కానీ వైద్య సహాయం పొందే వారినే సాధారణంగా కరోనా కేసులుగా లెక్కిస్తున్నారు. ఫలితంగా అనుకున్న దానికన్నా కరోనా బాధితుల సంఖ్య ఎక్కువగానే ఉన్నట్లు స్పష్టమవుతోంది.

మరో కారణం..

అభివృద్ధి దేశాలు కూడా జనాభాకు తగినట్లు పరీక్షలు నిర్వహించటంలో వెనకబడ్డాయి. తీవ్రమైన లక్షణాలు ఉన్నవారినే పరీక్షిస్తున్నారు. కరోనా సోకి తేలికపాటి లక్షణాలు ఉన్నవ్యక్తి అధికారులను సంప్రదించటం లేదు. అతడు ఒకవేళ వైరస్ నుంచి కోలుకుంటే.. అధికారిక లెక్కల్లో ఉండడు.

ఈ కారణం వల్ల కూడా కరోనాకు ప్రభావితమైనవారి సంఖ్య.. గణాంకాలను మించి ఉంటుందని తెలుస్తోంది. జనాభాలో చాలా మందికి వైరస్ సోకిందనేది వాస్తవం. కానీ తేలికపాటి లక్షణాల కారణంగా వాళ్లు గుర్తించటం లేదు.

లెక్క తప్పిందిలా!

ఎంత మందికి కోరనా సోకింది, వారిలో మంది ప్రాణాలు కోల్పోయారన్న సంఖ్యల ఆధారంగా మరణాల రేటును లెక్కిస్తారు. ఇందుకు అధికారిక గణాంకాలనే పరిగణనలోకి తీసుకుంటున్నారు అధికారులు. ఫలితంగా మరణాల రేటు వాస్తవానికన్నా అధికంగా కనిపిస్తోంది. ప్రజల్లో ఆందోళన మరింత పెరుగుతోంది.

ఈ సమస్యను అధిగమించేందుకు వైరస్ నిర్ధరణ పరీక్షలు పెంచాలి. అప్పుడే ప్రజల్లో కరోనా భయాలను పోగొట్టే అవకాశం ఉంది.

ఇదీ చూడండి:కరోనా కాలాన పరీక్షా సమయమిది!