కరోనా పంజా: కోటీ 60 లక్షలకు చేరువలో కేసులు

ప్రపంచవ్యాప్తంగా కరోనా విలయతాండవం చేస్తోంది. పలు దేశాల్లో సామాజిక వ్యాప్తి దశకు చేరుకుంటున్న నేపథ్యంలో రోజుకు 2 లక్షలకుపైగా కొత్త కేసులు నమోదవుతున్నాయి. మొత్తం కేసుల సంఖ్య కోటీ 60 లక్షలకు చేరువైంది. దాదాపు ఆరున్నర లక్షల మంది ప్రాణాలు కోల్పోయారు.

ప్రపంచంపై కరోనా రక్కసి కన్నెర్రచేస్తోంది. మృత్యు కోరలు చాస్తోంది. రోజురోజుకు కొత్త కేసుల నమోదులో సరికొత్త రికార్డులు నమోదవుతున్నాయి. రోజూ 2 లక్షలకుపైగా కేసులు వస్తుండటం ఆందోళన కలిగిస్తోంది. అయితే.. వైరస్​ నుంచి కోలుకుంటున్న వారి సంఖ్య పెరగటం కాస్త ఊరట కలిగించే విషయం. ప్రపంచవ్యాప్తంగా మొత్తం కేసుల సంఖ్య కోటీ 60 లక్షలకు చేరువైంది. సుమారు ఆరున్నర లక్షల మంది మృతి చెందారు.

• మొత్తం కేసులు: 15,940,379
• మొత్తం మరణాలు: 642,688
• కోలుకున్నవారు: 9,723,949
• యాక్టివ్​ కేసులు: 5,573,742

అమెరికాలో..

అగ్రరాజ్యంలో కరోనా ఉద్ధృతి కొనసాగుతోంది. రోజుకు 70-80 వేల వరకు కొత్త కేసులు నమోదవుతున్నాయి. దేశవ్యాప్తంగా మొత్తం కేసుల సంఖ్య 42.50 లక్షలకు చేరువైంది. 1.50 లక్షల మంది వరకు ప్రాణాలు కోల్పోయారు. 20 లక్షల మందికిపైగా వైరస్​ నుంచి కోలుకున్నారు.

బ్రెజిల్​లో..

కేసులు, మరణాల్లో రెండోస్థానంలో కొనసాగుతోన్న బ్రెజిల్​లో వైరస్​ వ్యాప్తి తగ్గటం లేదు. రోజువారీ కేసుల్లో కొత్త రికార్డులు నమోదవుతున్నాయి. దేశవ్యాప్తంగా మొత్తం కేసుల సంఖ్య 23.50 లక్షలకు చేరువైంది. 85 వేల మందికి పైగా ప్రాణాలు కోల్పోయారు.

రష్యాలో..

రష్యాలో కొవిడ్​ కేసుల సంఖ్య 8 లక్షలు దాటింది. 13 వేలకుపైగా వైరస్​కు బలయ్యారు. దాదాపు 6 లక్షల మంది వైరస్​ నుంచి కోలుకున్నారు.

ప్రపంచవ్యాప్తంగా పలు దేశాల్లో కేసుల వివరాలు

దేశం	మొత్తం కేసులు	మరణాలు
అమెరికా	4,248,327	148,490
బ్రెజిల్​	2,348,200	85,385
రష్యా	800,849	13,046
దక్షిణాఫ్రికా	421,996	6,343
మెక్సికో	378,285	42,645
పెరు	375,961	17,843
చిలీ	341,304	8,914
స్పెయిన్	319,501	28,432
బ్రిటన్	297,914	45,677