కరోనా పంజా: 3 లక్షలకు చేరువలో మరణాలు!

ప్రపంచవ్యాప్తంగా కరోనా కరాళ నృత్యం చేస్తోంది. కొన్ని దేశాల్లో కేసుల సంఖ్య తగ్గుతున్నప్పటికీ.. మరికొన్ని దేశాల్లో వేగంగా పెరగటం ఆందోళన కలిగిస్తోంది. ఇప్పటికే కేసుల సంఖ్య 42 లక్షలకు చేరువైంది. 2.83 లక్షల మందికిపైగా మరణించారు. అమెరికాలో వైరస్​ విలయతాండవం కొనసాగుతోంది.

రోజురోజుకూ తన ప్రభావాన్ని ఉద్ధృతంచేస్తూ.. కరోనా మహమ్మారి ప్రపంచదేశాలను వణికిస్తోంది. ప్రపంచవ్యాప్తంగా కేసుల సంఖ్య 42 లక్షలకు చేరువైంది. 2.83 లక్షల మందికిపైగా ప్రాణాలు కోల్పోయారు. 14 లక్షల 90 వేల మంది ఈ వైరస్​ బారి నుంచి బయటపడ్డారు.

అమెరికాలో..

అగ్రరాజ్యం అమెరికాను కరోనా కుదిపేస్తోంది. కొత్తగా 18,600 మందికి కరోనా సోకగా.. కేసుల సంఖ్య 13,67,638కి చేరింది. ప్రపంచంలోనే అత్యధికంగా.. అమెరికాలో 80 వేల మందికిపైగా మరణించారు. 2,56,336 మంది వైరస్​ నుంచి కోలుకున్నారు. లాక్​డౌన్​ ఆంక్షలు ఎత్తివేస్తోన్న క్రమంలో కేసుల సంఖ్య మరింత పెరిగే అవకాశం ఉంది.

రష్యాలో..

రష్యాలోనూ కొవిడ్ వ్యాప్తి తీవ్రంగా ఉంది. ఒక్కరోజే 11 వేల మంది వైరస్ బారినపడ్డారు. బాధితుల సంఖ్య 2.10 లక్షలకు చేరువలో ఉంది. రష్యాలో మొత్తం 1,915 మంది మరణించారు.

బ్రిటన్​లో..

బ్రిటన్‌లో కొత్తగా 3,900 వందల కేసులు నమోదయ్యాయి. కరోనా సోకిన వారి సంఖ్య 2,19,183కు చేరింది. మొత్తం 31, 855 మంది ప్రాణాలు కోల్పోయారు.

స్పెయిన్‌లో..

స్పెయిన్​లో కొత్తంగా 1900 మందికి కరోనా పాజిటివ్ రాగా.. కేసుల సంఖ్య 2, 64,663కు చేరింది. మృతుల సంఖ్య 26, 621కి చేరింది.

సౌదీలో..

సౌదీ అరేబియాలో కొత్తగా 19 వందలకు పైగా కొవిడ్ కేసులు నమోదయ్యాయి. మొత్తం కేసుల సంఖ్య 39,048కి చేరింది.

టర్కీలోనూ 1500 మందికి కొవిడ్ నిర్ధరణకాగా.. బాధితుల సంఖ్య 1.39 లక్షలకు చేరువలో ఉంది. ఇరాన్‌లో గత 24 గంటల్లో 1400 మందికి కొవిడ్ పాజిటివ్ తేలింది. 1.07 లక్షలకుపైగా కేసులు నమోదయ్యాయి. 6 వేల మందికి పైగా మరణించారు. పాకిస్థాన్‌లో ఒక్కరోజే 16 వందల మంది వ్యాధిబారిన పడ్డారు. బాధితుల సంఖ్య 30 వేలు దాటింది. ఇప్పటివరకు 700 మంది మరణించారు.