అమెరికాలో 10 నెలల కనిష్ఠానికి కరోనా మరణాలు

అమెరికాలో కరోనా మరణాలు 10 నెలల కనిష్ఠానికి తగ్గాయని అక్కడి ఆరోగ్యశాఖ తెలిపింది. బుధవారం 600 మంది మరణించగా.. గతేడాది జులై తర్వాత ఇవే అతి తక్కువ రోజువారీ మరణాలని పేర్కొంది. గత సెప్టెంబరు తర్వాత తొలిసారి 38వేల దిగువకు రోజువారీ కేసుల సంఖ్య తగ్గిందని వెల్లడించింది.

అమెరికాలో 45 శాతం మంది టీకా లబ్ధిదారులకు వ్యాక్సినేషన్ పూర్తైన వేళ రోజువారీ కొవిడ్ మరణాలు 10 నెలల కనిష్ఠానికి దిగి వచ్చాయి. బుధవారం కొత్తగా 600 మరణాలు నమోదవగా.. గతేడాది జులై తర్వాత ఇవే అతి తక్కువ రోజువారీ మరణాలని అమెరికా ఆరోగ్యశాఖ తెలిపింది. దాదాపు సగానికిపైగా రాష్ట్రాల్లో మరణాలు సున్నాగా నమోదు కాగా.. మరికొన్ని రాష్టాల్లో రోజువారీ ఈ సంఖ్య రెండంకెల కంటే దిగువకు వచ్చాయి.

రోజువారీ కరోనా కేసుల సంఖ్య గతేడాది సెప్టెంబర్ తర్వాత తొలిసారి 38 వేల దిగువకు తగ్గిందని అమెరికా ఆరోగ్యశాఖ వివరించింది. జనవరి నుంచి అమెరికాలో సగటున రోజూ 3,400 మంది కరోనాకు బలవుతున్నారు. గత నెల నుంచి వ్యాక్సినేషన్ కార్యక్రమం ఊపందుకోగా మరణాలు కూడా తగ్గుముఖం పడుతున్నాయని అధికారులు వివరించారు.

టీకా వల్లే ఇలా

వ్యాక్సినేషన్ వల్లే మరణాలు తగ్గుతున్నట్లు జాన్ హోప్‌కిన్స్ విశ్వవిద్యాలయ నిపుణులు కూడా స్పష్టం చేశారు. అమెరికాలో దాదాపు 45 శాతం మంది పెద్దవాళ్లు రెండు డోసుల టీకా తీసుకున్నారని, 58 శాతం మందికి కనీసం ఒక్క డోసు టీకా పంపిణీ చేశారని తెలిపారు. ఆ ఫలితాలు ఇప్పుడు కనిపిస్తున్నాయని చెప్పారు. గత వారమే 12 నుంచి 15 ఏళ్ల వారికి కూడా ఫైజర్ టీకా ఇచ్చేందుకు అనుమతి రాగా.. పాఠశాలలు కూడా తెరిచేందుకు త్వరలో పరిస్థితులు సహకరిస్తాయని అంచనా వేస్తున్నారు.

ఇదీ చూడండి:రెండు జైళ్లలో 3,000 మంది ఖైదీలకు కరోనా