కరోనా విషయంలో చైనాపై మరోసారి నిప్పులు చెరిగారు అమెరికా అధ్యక్షుడు డొనాల్డ్ ట్రంప్. రోజువారీ విలేకరుల సమావేశంలో మాట్లాడిన ఆయన.. కరోనా సంక్షోభం విషయంలో చైనా వ్యవహరించిన తీరుపై అసంతృప్తి వ్యక్తం చేశారు.
"ఇంతటి ప్రాణనష్టానికి కారణమైన అంశాన్ని అంత తేలిగ్గా తీసుకునేది లేదు. కరోనా వైరస్ వ్యాప్తిలో వారిదే బాధ్యత అని తేలితే తీవ్ర చర్యలు ఉంటాయి. 1917 తర్వాత కనీవినీ ఎరుగని రీతిలో ప్రజల ప్రాణాలకు ముప్పు తెచ్చింది."
- డొనాల్డ్ ట్రంప్, అమెరికా అధ్యక్షుడు
మొదట్లో బాగానే ఉండేవాళ్లం..
మహమ్మారి వెలుగులోకి రాకముందు వరకు చైనాతో సత్సంబంధాలు ఉండేవని గుర్తుచేసుకున్నారు ట్రంప్. వైరస్ విజృంభణ తర్వాత ఒక్కసారిగా పరిస్థితులు మారిపోయాయని అన్నారు. రెండు దేశాల మధ్య సంబంధాల విషయంలో తప్పకుండా భారీ తేడా ఉంటుందని స్పష్టం చేశారు. చైనాపై కోపంగా ఉన్నట్లు తెలిపారు.
వైరస్ వ్యాప్తి తొలిదశలో అమెరికా సాయం చేస్తామంటే కూడా చైనా నిరాకరించిందని పేర్కొన్నారు.
"మా సాయాన్ని వాళ్లు స్వీకరించి ఉండాల్సింది. వైరస్ గురించి వార్తలు వచ్చిన కొద్ది రోజులకే మేం సాయం చేస్తామని చెప్పాం. కానీ వాళ్లు వద్దన్నారు. ఎందుకంటే వాళ్లకు తెలుసు.. పరిస్థితులు ఘోరంగా ఉన్నాయని. అందుకే వాళ్లు మా జోక్యాన్ని ఇష్టపడలేదు."
- డొనాల్డ్ ట్రంప్, అమెరికా అధ్యక్షుడు
ప్రత్యర్థిపై విమర్శలు..
అధ్యక్ష ఎన్నికల్లో డెమొక్రటిక్ పార్టీ తరఫు అభ్యర్థి జో బిడెన్కు చైనా మద్దతు ఇస్తోందని ఆరోపించారు ట్రంప్. ఇదే వేదికగా బిడెన్పై తీవ్ర విమర్శలు చేశారు.
చైనా మద్దతగా నిలుస్తున్న బిడెన్ గెలిస్తే అమెరికాను ఆ దేశం స్వాధీనం చేసుకుంటుందని ఆరోపించారు ట్రంప్. బిడెన్ వ్యాపార విధానాల వల్ల గతంలో ఆయన పాలకవర్గం చైనా నుంచి భారీ స్థాయిలో ప్రయోజనం పొందిందని విమర్శించారు.
మరణాల్లో చైనాదే తొలిస్థానం..
అత్యాధునిక వైద్య సదుపాయాలున్న ఇటలీ, స్పెయిన్‌, బెల్జియం, ఫ్రాన్స్‌ వంటి దేశాల్లో మరణాల రేటు భారీగా ఉంటే.. చైనాలో మాత్రం 0.33 శాతం ఉండటం ఆశ్చర్యాన్ని కలిగిస్తుందన్నారు ట్రంప్.
మొన్నటివరకు చైనాలో 3వేలు ఉన్న మరణాల సంఖ్య తాజాగా 1,300 వరకు సవరించి 4,600కు చేరుకున్నాయని తెలిపారు. ఈ విషయాన్ని పరిశీలిస్తే.. ఆ దేశంలో అంతకుమించి మరణాలు సంభవించి ఉంటాయని ట్రంప్ అభిప్రాయపడ్డారు. దీని వెనుక కారణాలేంటో ఏదో ఒకరోజు బయటకు వస్తాయని హెచ్చరించారు.
ఇరాన్పైనా..
ఒక సమయంలో మొత్తం పశ్చిమాసియానే ఆక్రమించే స్థితిలో ఉన్న ఇరాన్.. ఇప్పుడు బతికితే చాలని భావిస్తోందని ట్రంప్ చెప్పుకొచ్చారు. ఇరాన్‌ను ఉదహరిస్తూ చైనాను హెచ్చరించే ప్రయత్నం చేశారు.
అమెరికాలో ఈస్టర్ తరహాలోనే రంజాన్ను కూడా సామాజిక దూరం పాటిస్తూ ఇంట్లోనే నిర్వహించుకోవాలని సూచించారు ట్రంప్.
మీడియాపైనా ఆగ్రహం..
అమెరికాలోని ప్రముఖ మీడియాను ఉద్దేశించి మాట్లాడుతూ.. నిజాయితీగా పాత్రికేయం చేయాలంటూ ఆగ్రహం వ్యక్తం చేశారు ట్రంప్. రాసే కథనాలకు మూలం ఎవరో తప్పనిసరిగా తెలియజేయాలని అన్నారు.
న్యూయార్క్ టైమ్స్ పత్రిక శ్వేతసౌధ ప్రతినిధి మేగీ హేబర్మాన్ను నేరుగా ప్రశ్నించారు. సరైన ఆధారం లేని కథనాలు రాయటం మానుకోవాలని హితవు పలికారు. సరైన ఆధారంతోనే రాస్తే ఆ కథనానికి మూలం ఎవరో వారి పేరును బయటకు చెప్తే అందులో సమస్య ఏంటని ప్రశ్నించారు.
వ్యాప్తిపై విచారణ..
కరోనా వ్యాప్తికి సంబంధించి స్వతంత్ర విచారణను ప్రారంభించింది ఆస్ట్రేలియా. ఈ సంక్షోభాన్ని ప్రపంచ ఆరోగ్య సంస్థ (డబ్ల్యూహెచ్ఓ) వ్యవహరించిన తీరుపైనా దర్యాప్తు చేస్తోంది. డబ్ల్యూహెచ్ఓకు నిధులు నిలిపేయటంపైనా ఆస్ట్రేలియా ఆందోళన వ్యక్తం చేసింది.
ఇదీ చూడండి:న్యూయార్క్లో తొలిసారి తగ్గిన మరణాలు
