Bagram air base: బగ్రామ్‌ ఎయిర్‌బేస్‌పై చైనా కన్ను!

అప్గానిస్థాన్(Afghanistan)​ నుంచి అమెరికా బలగాల ఉపసంహరణ పూర్తయిన క్రమంలో రెండు దశాబ్దాల పాటు ఉగ్రవాద నిర్మూలన కోసం అమెరికా ప్రధాన కేంద్రంగా చేసుకున్న బగ్రామ్​ ఎయిర్​ఫీల్డ్​ను(Bagram air base) స్వాధీనం చేసుకునేందుకు చైనా ప్రయత్నిస్తోందని హెచ్చరించారు ఐరాసలో అమెరికా మాజీ రాయబారి నిక్కీ హేలీ. చైనా కదలికలను నిశితంగా పరిశీలించాల్సిన అవసరం ఉందన్నారు. పాకిస్థాన్​ సాయంతో భారత్​ను ఎదుర్కొనేందుకు చైనా యత్నించవచ్చన్నారు.

అమెరికా.. అఫ్గానిస్థాన్‌ను వీడిన నేపథ్యంలో ఇప్పుడు చైనా ఆ స్థానాన్ని భర్తీ చేయడానికి చూస్తోందన్న వాదనలు తెరపైకి వస్తున్నాయి. తాజాగా ఐరాసలో అమెరికా మాజీ రాయబారి నిక్కీ హేలీ(Nikki haley on china) కూడా ఇటువంటి అనుమానమే వ్యక్తం చేశారు. ఆమె ఫాక్స్‌ న్యూస్‌కు ఇచ్చిన ఇంటర్వ్యూలో మాట్లాడుతూ.. చైనా భవిష్యత్తులో బగ్రామ్‌ వైమానిక స్థావరంలో(Bagram air force base) తిష్ఠ వేసే అవకాశం ఉందన్నారు. చైనాను ఓ కంట కనిపెట్టాలని అభిప్రాయపడ్డారు. తాము పోరాట పటిమ చూపకపోవడం వల్ల భవిష్యత్తులో రష్యా వంటి దేశాలు మరిన్ని ఇబ్బందులు సృష్టించే ప్రమాదం ఉందని హెచ్చరించారు. "వారు అఫ్గానిస్థాన్‌లోకి ప్రవేశించి పాక్‌ సాయంతో బలపడవచ్చు. ఆ తర్వాత భారత్‌కు వ్యతిరేకంగా పనిచేయవచ్చు" అని నిక్కీ పేర్కొన్నారు.

ఐరాసలో అమెరికా మాజీ రాయబారి నిక్కీ హేలీ

అమెరికా సైబర్‌ నేరాలను ఎదుర్కొనేలా వ్యవస్థలను బలోపేతం చేసుకోవాలని నిక్కీ సూచించారు. మిత్ర దేశాలతో కలిసి పనిచేయాలన్నారు. ఆస్ట్రేలియా, జపాన్‌, భారత్‌తో సమన్వయం చేసుకోవాలని పేర్కొన్నారు. అమెరికా వారి వెనుక ఉందని ఆ దేశాలకు భరోసా ఇవ్వాలని బైడెన్‌కు సూచించారు.

తాలిబన్లకు చైనా మద్దతు..

తాలిబన్లను(afghan Taliban) మంచి చేసుకొనే చైనా అప్పుడే పని ప్రారంభించింది. అఫ్గానిస్థాన్‌ను ఒక వీరోచిత దేశంగా అభివర్ణించింది. ఆ దేశం ఎప్పుడూ విదేశీ శక్తులకు తలొగ్గలేదని చైనా విదేశాంగ శాఖ పేర్కొంది. రెండు దశాబ్దాల పాటు జరిగిన యుద్ధంలో అఫ్గాన్‌ పౌరులు ప్రాణాలు కోల్పోవడంపై దర్యాప్తు జరపాలని కోరింది. అమెరికా వాయుసేన దాడుల్లో(America air strikes) అధికారిక లెక్కల కంటే చాలా ఎక్కువ మందే ప్రాణాలు కోల్పోయారని తెలిపింది. అమెరికా ప్రణాళికా రహితంగా బలగాలను ఉపసంహరించుకొందని విమర్శించింది. తాలిబన్లతో స్నేహ, సహకార సంబంధాలు ఏర్పరుచుకోవడానికి సిద్ధంగా ఉన్నట్లు డ్రాగన్‌ చెప్పింది. ఈ విషయాన్ని చైనా విదేశాంగశాఖ ప్రతినిధి వాంగ్‌ వెన్‌బిన్‌ పేర్కొన్నారు.

ఇదీ చూడండి:అఫ్గాన్​లో కీలక ప్రాంతాన్ని ఖాళీ చేసిన అమెరికా