చైనాతో వాణిజ్య ఒప్పందానికి సిద్ధంగా లేము: ట్రంప్​

అమెరికాతో వాణిజ్య వివాదంతో చైనా తీవ్ర ఇబ్బందులు ఎదుర్కొంటోందని అన్నారు అమెరికా అధ్యక్షుడు డొనాల్డ్​ ట్రంప్​. ఒప్పందం కుదుర్చకోవాలని చూస్తోందన్నారు. కానీ తాను అందుకు సిద్ధంగా లేనని పునరుద్ఘాటించారు.

అగ్రరాజ్యంతో వాణిజ్య యుద్ధం కారణంగా తలెత్తిన సమస్యలతో చైనా సతమతం అవుతోందని అన్నారు అమెరికా అధ్యక్షుడు డొనాల్డ్​ ట్రంప్​. అందుకే ఆ దేశం వీలైనంత త్వరగా తమతో రాజీ కుదుర్చుకోవాలని చూస్తోందని ఎద్దేవా చేశారు. కానీ ఒప్పందానికి తాను సిద్ధంగా లేనని స్పష్టం చేశారు.

సుమారు 350 బిలియన్​ డాలర్ల చైనా ఉత్పత్తులపై ఇటీవలే 10 శాతం సుంకాలను పెంచుతూ నిర్ణయం తీసుకున్నారు ట్రంప్​. సెప్టెంబర్​ 1 నుంచి పెంచిన సుంకాలు అమలులోకి రానున్నాయి. ఈ నేపథ్యంలో విలేకరులు అడిగిన ప్రశ్నకు సమాధానమిచ్చారు ట్రంప్.

"చైనా ఈ సమస్యను పరిష్కరించాలని అనుకుంటోంది. గడిచిన దశాబ్దాల కాలంలో ఓ చెత్త సంవత్సరాన్ని చవిచూసింది. చైనా పరిస్థితి మరింత దిగజారుతోంది. వేల సంస్థలు చైనాను వీడుతున్నాయి. వారు ఒప్పందం కుదుర్చుకోవాలని అనుకుంటున్నారు. కానీ నేను అందుకు సిద్ధంగా లేను."

- డొనాల్డ్​ ట్రంప్​, అమెరికా అధ్యక్షుడు.

గత ఏడాది నవంబర్​ నుంచి పలుమార్లు వాణిజ్య చర్చలు జరిపాయి ఇరు దేశాలు. కానీ అవేవీ ఫలించలేదు.

ఇదీ చూడండి: డొనాల్డ్​ ట్రంప్​కు కిమ్​ మరో 'ప్రేమలేఖ'