ట్రంప్​ కావాలనే మాపై నిందలేస్తున్నారు: చైనా

కరోనా కేంద్రంగా అమెరికా, చైనా మధ్య మాటల యుద్ధం పెరుగుతోంది. కరోనా ఉద్ధృతిని చైనా దాచిపెట్టిందని ఇటీవల అమెరికా అధ్యక్షుడు డొనాల్డ్​ ట్రంప్​ చేసిన వ్యాఖ్యలను బీజింగ్​ తిప్పికొట్టింది. ట్రంప్​ కావాలనే తమపై నిందలు వేసే ప్రయత్నం చేస్తున్నారని ఆరోపించింది.

కరోనా వ్యాప్తి విషయంలో అమెరికా అధ్యక్షుడు డొనాల్డ్​ ట్రంప్​ చేసిన వ్యాఖ్యలపై గట్టిగా స్పందించింది చైనా. ట్రంప్​ కావాలనే తమపై నిందలు వేసే ప్రయత్నం చేస్తున్నారని ఆరోపించింది.

ఆరంభంలోనే వైరస్ ఉద్ధృతిపై చైనా స్పష్టత ఇవ్వనందున ఇప్పుడు ప్రపంచం పెద్ద మూల్యం చెల్లించుకుంటోందని ట్రంప్​ గురువారం ఆరోపించారు. ప్రపంచ వ్యాప్తంగా ఇప్పటి వరకు 10వేలమంది మృతి చెందగా.. 2లక్షలకు పైగా వైరస్​ బారిన పడ్డారు. అయితే ట్రంప్​ వ్యాఖ్యలను చైనా విదేశాంగ శాఖ ప్రతినిధి తిప్పికొట్టారు.

వైరస్​కు వ్యతిరేకంగా చైనా పోరాడుతుంటే.. అమెరికాలోని కొంతమంది అందుకు భంగం కలిగించే ప్రయత్నాలు చేస్తున్నారు. అంతే కాకుండా లేనిపోని నిందలను వేస్తున్నారు.

-జెంగ్ షువాంగ్​, చైనా విదేశాంగ శాఖ ప్రతినిధి

వైరస్​ వ్యాప్తిపై ఇరుదేశాలు గత కొద్దిరోజులుగా విమర్శలు గుప్పించకుంటున్నాయి. అమెరికా నుంచే కరోనా వ్యాప్తి చెందిందని చైనా ఆరోపించింది. బీజింగ్​ విమర్శలను తిప్పికొడుతూ ట్రంప్​ చేసిన వ్యాఖ్యలు పెను దుమారం రేపాయి.