వాణిజ్య యుద్ధం: అమెరికాపై చైనా​ ప్రతీకారం

అమెరికా ఉత్పత్తులపై సుంకాలు పెంచుతూ చైనా నిర్ణయం తీసుకుంది. అంతేకాక విశ్వసనీయత లేని విదేశీ కంపెనీలపై వేటు వేసేందుకు సిద్ధమైంది డ్రాగన్​ దేశం. చైనా దిగ్గజ కంపెనీ హువావేపై అమెరికా ఆంక్షలు విధించడానికి ప్రతీకారంగా చైనా ఈ నిర్ణయం తీసుకుందని విశ్లేషకులు భావిస్తున్నారు.

అమెరికా- చైనా మధ్య వాణిజ్య ఉద్రిక్తతలు రోజురోజుకూ తీవ్రమవుతున్నాయి. అమెరికా ఉత్పత్తులపై భారీగా సుంకాలు పెంచుతున్నట్టు చైనా ప్రకటించింది. ఈ నిర్ణయంతో పాటు విశ్వసనీయత లేని సంస్థలపై వేటు వేసేందుకు ప్రణాళికలు సిద్ధం చేస్తున్నట్టు వెల్లడించింది. చైనా టెలికం దిగ్గజం హువావేపై అమెరికా అంతర్జాతీయంగా విధించిన ఆంక్షలకు ప్రతీకారంగానే డ్రాగన్ దేశం​ ఈ చర్యలకు సిద్ధపడిందని విశ్లేషకులు భావిస్తున్నారు.

చర్చల విఫలంతో మళ్లీ మొదటికి..

ఇరు దేశాల మధ్య జరిగిన చర్చలు విఫలమైన నేపథ్యంలో మళ్లీ ఉద్రిక్తతలు మొదలయ్యాయి. చైనా వైఖరి వల్లే ఎలాంటి ఒప్పందం లేకుండా చర్చలు ముగిశాయని అమెరికా ఆరోపించింది. అనంతరం పోటాపోటీగా సుంకాల పెంపు, కంపెనీలపై వేటు వేస్తూ సమస్యను మరింత తీవ్రం చేస్తున్నారని విశ్లేషకులు తెలిపారు.

దెబ్బకు దెబ్బ

ఈ క్రమంలోనే దేశ భద్రత కారణాలతో హువావేను బ్లాక్​లిస్ట్​లో చేర్చినట్టు అమెరికా ప్రకటిచింది. అనంతరం ఆ నిర్ణయాన్ని 90 రోజుల పాటు వాయిదా వేసింది. ఇప్పటికే 200 బిలియన్ డాలర్ల చైనా ఉత్పత్తులపై సుంకాలను అమెరికా 25 శాతానికి పెంచింది.

దీనికి ప్రతిగా అమెరికా ఎగుమతి చేస్తున్న 60 బిలియన్​ డాలర్ల ఉత్పత్తులపై 25 శాతం సుంకం విధించింది చైనా. ఇప్పటివరకు మొత్తంగా 360 బిలియన్​ డాలర్ల ఉత్పత్తులపై రెండు దేశాలు సుంకాలను పెంచాయి.

ఇదీ చూడండి: భారత్​కు జీఎస్​పీ హోదా రద్దు: ట్రంప్​