ఉగ్రవాదంపై పోరులో పాక్​ ఎన్నో త్యాగాలు చేసిందట!

ఉగ్రవాదంపై పోరులో ఎన్నో త్యాగాలు చేసిందంటూ పాకిస్థాన్​పై చైనా ప్రశంసలు కురిపించింది. ఉగ్రవాదం విషయంలో పాక్​కు భారత్​, అమెరికా హెచ్చరికలు చేసిన నేపథ్యంలో ఇలా వెనకేసుకొచ్చింది చైనా.

ఉగ్రవాదాన్ని ఎగదోసే పాకిస్థాన్​కు మరోసారి వంత పాడింది చైనా. ఉగ్రవాదంపై పోరులో పాక్​ ఎన్నో త్యాగాలు చేసిందని కితాబిచ్చింది. ఉగ్రమూకలపై పాక్​​ తక్షణమే కఠిన చర్యలు తీసుకోవాలని భారత్​-అమెరికా హెచ్చరించిన నేపథ్యంలో చైనా ఈ ప్రకటన చేసింది.

"ఉగ్రవాదం.. అన్ని దేశాలు ఎదుర్కొంటున్న సమస్య. ఉగ్రవాదంపై పోరులో పాకిస్థాన్​ ఎంతో కృషి చేస్తోంది. ఎన్నో త్యాగాలు చేసింది. అంతర్జాతీయ సమాజం దానిని గుర్తించి గౌరవించాలి. అన్ని రకాల ఉగ్రవాదాన్ని చైనా వ్యతిరేకిస్తుంది."

- ఝావో లిజియాన్​, చైనా విదేశాంగ శాఖ అధికార ప్రతినిధి

భారత్​-అమెరికా తీవ్రవాద నిరోధక ఉమ్మడి బృందం 17వ సమావేశం ఈ నెల 9,10 తేదీల్లో వర్చువల్​గా జరిగింది. ఉగ్రవాద కార్యకలాపాలు పాక్​ భూభాగంలో జరగకుండా ఆ దేశం​​ తక్షణం కఠిన చర్యలు చేపట్టాల్సిన అవసరం ఉందని భారత్​, అమెరికా సంయుక్తంగా ప్రకటన చేశాయి. ముంబయి, పఠాన్​కోట్​ దాడులకు పాల్పడిన ముష్కరులపై సత్వరం చర్యలు తీసుకోవాలని డిమాండ్ చేశాయి.

ఇదీ చూడండి:'ఉగ్రమూకలపై పాక్​ కఠిన చర్యలు తీసుకోవాలి'