'చైనా.. ఈ శతాబ్దానికే అతిపెద్ద ప్రమాదకారి'

21వ శతాబ్దానికే అతిపెద్ద ప్రమాదకారి చైనా అని అమెరికా పేర్కొంది. అక్రమ విధానాలను అనుసరిస్తూ.. ఇండో -పెసిఫిక్​ ప్రాంతంలో ఆ దేశం​ అలజడులు సృష్టిస్తోందని చెప్పింది. ఈ ఆగడాలను అరికట్టేందుకు తాము రంగంలోకి దిగేమందే యథాతథ స్థితిని డ్రాగన్ మార్చే ప్రమాదం ఉందని హెచ్చిరించింది.

చైనాను.. 21వ శతాబ్దానికే అతిపెద్ద, దీర్ఘకాలిక వ్యూహాత్మక ప్రమాదకారిగా.. అమెరికా అభివర్ణించింది. డ్రాగన్​ ఇంటా- బయట అనుసరిస్తున్న అక్రమ విధానాలతో ఇండో-పెసిఫిక్ ప్రాంతంలోని వాణిజ్యం, సంస్థలు, ప్రజలు తీవ్ర సవాళ్లను ఎదుర్కొంటున్నారని పెంటగాన్ ఆరోపించింది.

చైనా తన సైన్యాన్ని ద్విగుణీకరించుకోవడం ద్వారా ఇండో పసిఫిక్ ప్రాంతంలో సమతుల్యతను దెబ్బతీస్తోందని అమెరికా ఆక్షేపించింది. తద్వారా అమెరికాతో పాటు దాని భాగస్వామ్య దేశాల్లో డ్రాగన్ల పట్ల వ్యతిరేక భావనలకు కారణమవుతోందని పెంటగాన్ అధికారి చెప్పారు. ఈ విధంగా సైనిక అసమతుల్యత తెస్తున్న చైనా.. ఇండో పసిఫిక్ ప్రాంతంలో దాని ఆగడాలు నిలువరించేందుకు అమెరికా రంగంలోకి దిగేలోపే.. చైనా ఏకపక్షంగా యథాతథస్థితిని మార్చే ప్రమాదం పొంచి ఉందని హెచ్చరించారు. అయితే.. సైనికబలంతో చైనా చేయాలనుకుంటున్న పనులు సాధ్యపడడం అంత సులువేమీ కాదని, అమెరికా దాని మిత్రదేశాలతో కలిసి అడ్డుకుంటుందని పేర్కొన్నారు.

'భారత్​కు 'రక్షణ'లో సహకరిస్తాం'

భారత్‌లో రక్షణ ఆయుధ పరిశ్రమ వేళ్లూనుకునేందుకు అమెరికా సహకరిస్తుందని పెంటగాన్ తెలిపింది. భారత్‌కు ఆయుధాలు విక్రయించడం, సాంకేతిక తోడ్పాటుతో సరి పెట్టకుండా.. రక్షణ పరికరాలు, ఆయుధాల తయారీలో ఆ దేశం​​ స్వయంసమృద్ధి సాధించాలన్నది జోబైడెన్ అభిమతమని వివరించింది.

తద్వారా భారత్‌ తనను తాను రక్షించుకోవడమే కాక ఆసియాపసిఫిక్ ప్రాంతంలో భాగస్వామ్యదేశాలకు మద్దతుగా కూడా నిలవాలని ఆకాంక్షిస్తున్నట్లు పెంటగాన్ అధికారి తెలిపారు. అమెరికాకు భారత్ అత్యంత విశ్వాసపాత్రమైన మిత్రపక్షమని రక్షణరంగంలో అమెరికాకు అతిపెద్ద భాగస్వామి అని సదరు అధికారి స్పష్టం చేశారు.

ఇదీ చూడండి:భారత పర్యటనకు అమెరికా రక్షణ మంత్రి