ప్రపంచానికి పెను ముప్పుగా మారుతున్న చైనా: ట్రంప్​

చైనా తన రక్షణ సామర్థ్యాన్ని పెంచుకోవటంపై ఆందోళన వ్యక్తం చేశారు అమెరికా అధ్యక్షుడు డొనాల్డ్​ ట్రంప్​. ఆ దేశం ప్రపంచానికి పెను ముప్పుగా మారుతోందన్నారు. దీనికోసం సుంకాల రూపంలో అమెరికా డబ్బును చైనా వినియోగిస్తోందని ఆరోపించారు. డ్రాగన్ దేశంతో పాక్షికంగా కాకుండా పూర్తి స్థాయి ఒప్పందం చేసుకోవాలనుకుంటున్నట్లు స్పష్టం చేశారు ట్రంప్.

చైనా మిలిటరీ సామర్థ్యాన్ని గణనీయంగా పెంచుకోవటంపై అమెరికా అధ్యక్షుడు డొనాల్డ్​ ట్రంప్​ ఆందోళన వ్యక్తం చేశారు. కమ్యూనిస్ట్​ దేశం ప్రపంచానికి పెను ముప్పుగా మారుతుందని అభిప్రాయపడ్డారు.

చైనా రక్షణ సామర్థ్యాలను పెంచడానికి అమెరికా మేధో సంపత్తిని దొంగిలించకుండా ఆపలేకపోయారని గత అగ్రరాజ్య పాలకులను తప్పుబట్టారు ట్రంప్​. తనకన్నా ముందు పనిచేసిన అధ్యక్షులు ఏడాదికి 500 బిలియన్​ డాలర్లకు పైగా చైనా దోచుకునేందుకు అనుమతించారని ఆరోపించారు. కానీ తాను అలా చేయటం లేదని ఉద్ఘాటించారు. ఆ సొమ్ము తీసుకునేందుకు చైనాను అనుమతిస్తే.. దానిని సైనిక విషయాలల్లో ఖర్చు చేస్తుందని ట్రంప్ పేర్కొన్నారు.

" ప్రపంచంలో ఏ దేశం చేయని విధంగా చైనా రక్షణ సామర్థ్యాన్ని వేగంగా పెంచుకోవటం వల్ల ప్రపంచానికి పెను ముప్పుగా మారుతోంది. అందుకోసం అమెరికా డబ్బును చైనా వినియోగిస్తోంది."

- డొనాల్డ్​ ట్రంప్​, అమెరికా అధ్యక్షుడు

వివాదాస్పద దక్షిణ చైనా సముద్రంలో అమెరికా ఆధిపత్యాన్ని ఎదుర్కోవడమే లక్ష్యంగా బీజింగ్​ తన సైనిక వ్యయాన్ని 7 శాతం వృద్ధితో 152 బిలియన్​ డాలర్లకు పెంచుకున్న నేపథ్యంలో ఈ వ్యాఖ్యలు చేశారు ట్రంప్​.

'ఎన్నికలకు ముందు ఒప్పందం అవసరం లేదు'

2020 అమెరికా అధ్యక్ష ఎన్నికలకు ముందు చైనాతో ఒప్పందం అవసరం లేదని అభిప్రాయపడ్డారు ట్రంప్​. కమ్యూనిస్ట్​ దేశంతో పాక్షికంగా కాకుండా పూర్తి స్థాయి ఒప్పందం చేసుకోవాలనుకుంటున్నట్లు స్పష్టం చేశారు.

" పూర్తి స్థాయి ఒప్పందం కోసం వేచిచూస్తున్నాం. పాక్షిక ఒప్పందం కోసం కాదు. మన వ్యవసాయ ఉత్పత్తుల కొనుగోలును చైనా ప్రారంభించింది. గత వారం నుంచి మీరు గమనించే ఉంటారు అవి భారీ కొనుగోళ్లు. కానీ నేను అందుకోసం చూడటం లేదు. మేము పెద్ద ఒప్పందం కోసం చూస్తున్నాం."

- డొనాల్డ్​ ట్రంప్​, అమెరికా అధ్యక్షుడు.

ఇదీ చూడండి: ఇరాన్​కు అమెరికా షాక్​.. మరోసారి కఠిన ఆంక్షలు