అమెరికాతో చైనా జగడాలను మాని, శాంతి మంత్రం జపిస్తున్నట్లుగా కనిపిస్తోంది. అమెరికా అధ్యక్షుడు జో బైడెన్ ప్రతిపాదించిన విదేశాంగ విధానంపై.. ఆ దేశం సానుకూలంగా స్పందించింది. అమెరికా, చైనాలు కలిస్తే ఎన్నో గొప్ప విజయాలు సాధించవచ్చని పేర్కొంది. తమ మధ్య ఉన్న విభేదాల కంటే ఉమ్మడి ఆసక్తులు.. అత్యంత బలమైనవని చెప్పింది. ఈ మేరకు చైనా విదేశాంగ శాఖ ప్రతినిధి వాంగ్ వెన్బిన్ తెలిపారు.
"పెద్ద దేశాలైన చైనా, అమెరికాలు.. ప్రపంచ శాంతి, శ్రేయస్సును కాపాడటంలో బాధ్యతలను పంచుకుంటాయి. ఇరు దేశాల మధ్య విభేదాలు ఉండటం సహజమే అయినా.. అవి ఇరు దేశాల ఉమ్మడి ప్రయోజనాల ముందు చాలా చిన్నవి. అమెరికా, చైనాలు కలిస్తే.. తమకే కాదు, ప్రపంచ దేశాలకు ఎంతో ఉపయుక్తకరంగా ఉంటుంది."
--వాంగ్ వెన్బిన్, చైనా విదేశాంగ శాఖ ప్రతినిధి.