హాంగ్​కాంగ్ కేంద్రంగా చైనా, అమెరికా కొత్త ఫైట్​

హాంగ్​కాంగ్​ నిరసనల వెనుక ఆమెరికా హస్తముందని చైనా ఆరోపించింది. హాంగ్​కాంగ్​​ అల్లర్లకు అగ్రరాజ్యం మద్దతిస్తూ చైనా అభివృద్ధిని అడ్డుకుంటోందని విమర్శించింది.

అమెరికాపై చైనా మరోసారి ఘాటు విమర్శలు చేసింది. హాంగ్​కాంగ్​​లో కొనసాగుతున్న నిరసనల వెనుక అగ్రరాజ్యం హస్తముందని ఆరోపించింది డ్రాగన్ దేశం. ఒకవైపు అమెరికాతో వాణిజ్య యుద్ధంపై చర్చలు జరుపుతున్న చైనా... మరోవైపు ఇలాంటి ఆరోపణలు చేయడం సర్వత్రా చర్చనీయాంశమైంది.

హాంగ్​కాంగ్​ నిరసనలపై అమెరికా విదేశాంగ మంత్రి మైక్​ పాంపియో చేసిన వ్యాఖ్యలను చైనా తప్పుపట్టింది. నిరసనల విషయంలో చైనా సరైన నిర్ణయం తీసుకోవాలని ఇటీవలే అగ్రరాజ్య విదేశాంగమంత్రి వ్యాఖ్యానించారు. పాంపియో ఇంకా సీఐఏ ప్రధానాధికారిలాగే ప్రవర్తిస్తున్నారని మండిపడింది చైనా. విదేశాంగ మంత్రిగా నియమితులు కాకముందు సీఐఏ డైరెక్టర్​గా పని చేశారు పాంపియో.

'చైనా అభివృద్ధిని అడ్డుకోవడం కోసమే..'

హాంగ్​కాంగ్ నిరసనల్లో చాలా మంది అమెరికన్లు ఉన్నట్లు చైనా విదేశాంగ శాఖ అధికార ప్రతినిధి హువా చుయింగ్ ఆరోపించారు. చైనా అభివృద్ధికి ఆటంకం కలిగించడం కోసం పాశ్చాత్య దేశాలు హాంగ్​కాంగ్​ నిరసనల రూపంలో కుట్రలు పన్నుతున్నాయని చుయింగ్​ మండిపడ్డారు.

నేరపూరిత కేసుల విచారణ కోసం హాంగ్​కాంగ్ పౌరులను చైనాకు అప్పగించాలన్న బిల్లుకు వ్యతిరేకంగా ఈ ఆందోళనలు మొదలయ్యాయి. బిల్లును నిలిపివేస్తున్నట్లు హాంగ్​కాంగ్​ సీఈఓ ప్రకటించినా... ప్రజలు వెనక్కి తగ్గడంలేదు. బిల్లును పూర్తిగా రద్దు చేయాలన్న డిమాండ్​తో నిరసనలు కొనసాగిస్తున్నారు.

ఇదీ చూడండి: అమెరికాలో రాజకీయ పార్టీల 'స్ట్రా'ల యుద్ధం