ఫ్లూ, క్యాన్సర్, కరోనా... అన్నింటిపైనా ఆ బామ్మదే విజయం

వందేళ్ల క్రితం ప్రపంచాన్ని కుదిపేసిన స్పానిష్​ ఫ్లూ సమయంలో జన్మించిన ఓ బామ్మ.. ఇప్పుడు కరోనాను జయించింది. అమెరికాకు చెందిన 101 ఏళ్ల ఏంజెలినా ఫ్రైడ్​మ్యాన్​కు​ ఇటీవల కరోనా సోకగా.. రెండోసారి నిర్వహించిన పరీక్షల్లో నెగటివ్​గా తేలింది. ఈ వృద్ధురాలు గతంలో క్యాన్సర్​పైనా పోరాడి విజయం సాధించడం విశేషం.

ప్రపంచదేశాలను కరోనా కలవరపెడుతోన్న వేళ.. ఓ శతాధిక వృద్ధురాలు అలవోకగా వైరస్​ను జయించింది. ఒకప్పుడు ప్రపంచాన్ని గడగడలాడించిన స్పానిష్​ ఫ్లూ విజృంభణ సమయంలోనే ఆమె జన్మించడం గమనార్హం. అలా... రెండు మహమ్మారులను తట్టుకొని జీవించిన మహిళగా నిలిచింది అమెరికాలోని న్యూయార్క్​కు చెందిన ఏంజెలినా ఫ్రైడ్​మ్యాన్​.

లేక్​ మోహీగన్​ సమీపంలోని నర్సింగ్​ హోంలో ఉండే ఏంజెలినా.. సాధారణ వైద్య పరీక్షల నిమిత్తం మార్చి 21న ఆసుపత్రిలో చేరింది. అయితే.. పరీక్షలు నిర్వహించగా ఆమెకు కరోనా పాజిటివ్​గా తేలింది. అనంతరం.. అక్కడే ఉండి వైద్యం తీసుకుంది.

క్యాన్సర్​పైనా పోరాడి...

చికిత్స సమయంలో అడపాదడపా జ్వరం భయపెట్టినా చివరకు ఏప్రిల్​ 20న నిర్వహించిన పరీక్షల్లో ఫలితం నెగటివ్​గా వచ్చింది. ఈ బామ్మ ప్రాణాంతక క్యాన్సర్​నూ అధిగమించడం విశేషం.

ఏంజెలినా కొవిడ్​ నుంచి కోలుకోవడంపై ఆమె కుమార్తె సంతోషం వ్యక్తం చేసింది. తన తల్లిని పోరాటయోధురాలిగా అభివర్ణించింది.

పుట్టగానే తల్లి మరణం..

స్పానిష్​ ఫ్లూ విజృంభిస్తున్న సమయంలోనే అత్యంత ప్రతికూల పరిస్థితుల నడుమ ఏంజెలినా పుట్టింది. ఇటలీ నుంచి న్యూయార్క్​కు వలస వెళ్తూ పడవలో బిడ్డను ప్రసవించి మరణించింది ఆమె తల్లి.

1918-20 సమయంలో స్పానిష్​ ఫ్లూ ప్రపంచాన్ని గజగజ వణికించింది. 5 కోట్ల మంది ఈ మహమ్మారి సోకి బలయ్యారు. ప్రపంచవ్యాప్తంగా 50 కోట్ల మంది వైరస్​ బారిన పడ్డారు.

ఇదీ చూడండి: అప్పుడు స్పానిష్‌ఫ్లూ.. ఇప్పుడు కరోనాను జయించిన బామ్మ!