వెనిజువెలా నగరాల్లో మరోమారు చీకట్లు

లాటిన్ అమెరికా దేశం వెనిజువెలాను మరోసారి అంధకారం చుట్టుముట్టింది. విద్యుత్ వ్యవస్థ మరోమారు కుప్పకూలింది. శుక్రవారం రాజధాని కారకస్​ సహా పలు పట్టణాలు విద్యుత్​ లేక చీకట్లోనే గడపాల్సొచ్చింది.

రాజకీయ సంక్షోభంతో కొట్టుమిట్టాడుతున్న లాటిన్​ అమెరికా దేశం వెనిజువెలా ఇప్పుడు తీవ్ర విద్యుత్ సమస్యతో సతమతమవుతోంది. రాజధాని కారకస్​ సహా పలు నగరాలు విద్యుత్ అంతరాయం వల్ల అంధకారంలో చిక్కుకున్నాయి. మార్చి 7న మొదటిసారి తీవ్ర విద్యుత్​ అంతరాయం ఏర్పడగా, తాజాగా శుక్రవారం మూడోసారి ఈ సమస్య ప్రజల్ని ఇబ్బందుల్లోకి నెట్టింది.

"విద్యుత్​ అంతరాయానికి మేము నిరసన వ్యక్తం చేస్తున్నాం. ఇది రాజ్యాంగం మాకు కల్పించిన హక్కు. రాజ్యాంగాన్ని అనుసరించి మేము శాంతియుతంగానే మా నిరసన తెలుపుతాం."
- కార్లోస్​ డ్యూరన్​, స్వయం ఉపాధి నిపుణుడు

శుక్రవారం రాత్రి 7 గంటల 10 నిమిషాలకు విద్యుత్ అంతరాయం మొదలైంది. కారకస్​తో పాటు మరాకైబో, వాలెన్సియా, మారాకీ, శాన్​ క్రిస్టోబల్ నగరాలకు విద్యుత్ సరఫరా నిలిచిపోయింది.

రాజకీయ సంక్షోభం...

వెనిజువెలాలో ప్రస్తుతం రాజకీయ సంక్షోభం నెలకొంది. అధ్యక్షుడు మదురోను కాదని ప్రతిపక్షనేత గైడో తనకు తానుగా వెనిజువెలా అధ్యక్షునిగా ప్రకటించుకున్నారు. గైడో ప్రభుత్వాన్ని అమెరికా సహా సుమారు 50 దేశాలు గుర్తించాయి. మదురోకు రష్యా మద్దతిస్తోంది.

ఈ రాజకీయ సంక్షోభం వెనిజువెలాను ఆర్థికంగా తీవ్ర కష్టాల్లోకి నెట్టనుంది. ప్రజల జీవన ప్రమాణాలు క్షీణిస్తున్నాయి. వీరికి సహాయం చేయడానికి రెడ్​క్రాస్​ సంస్థ ముందుకు వచ్చింది. ఏప్రిల్​ నెలలో వెనిజువెలా ప్రజలకు పోషకాహారం, మందులు సరఫరా చేయనున్నట్లు తెలిపింది.

ఇదీ చూడండి :'భారత్​పై నిఘా కాదు- వ్యర్థాల పరిశీలనే'