భారత విమానాలపై నిషేధం మరోసారి పొడిగింపు

భారత్​ నుంచి వచ్చే విమానాలపై విధించిన నిషేధాన్ని మరోసారి పొడిగిస్తున్నట్లు కెనడా ప్రభుత్వం ప్రకటించింది. సెప్టెంబర్ 21 వరకు ఈ నిషేధం కొనసాగుతుందని వెల్లడించింది.

భారత్​ నుంచి విమానాల రాకపోకలపై విధించిన ఆంక్షలకు సంబంధించి కెనడా ప్రభుత్వం కీలక ప్రకటన చేసింది. విమానాలపై నిషేధాన్ని మరోసారి పొడిగిస్తున్నట్లు తెలిపింది. కొవిడ్ వ్యాప్తి దృష్ట్యా సెప్టెంబర్​ 21 వరకు ఈ ఆంక్షలు కొనసాగుతాయని స్పష్టం చేసింది.

ఏప్రిల్​లో.. కొవిడ్​ రెండో ఉద్ధృతి దృష్ట్యా భారత్​ నుంచి నేరుగా తమ దేశానికి వెళ్లే విమానాలపై బ్యాన్​ విధించింది కెనడా. ఈ నేపథ్యంలో మరోసారి కెనడా ప్రజల ఆరోగ్యం దృష్ట్యా నిషేధాన్ని పొడిగిస్తున్నట్లు ఆ దేశ రవాణా శాఖ మంత్రి ఒమర్​ అల్​గబ్రా ట్వీట్ చేశారు.

అలా అయితే ఓకే..

భారత్​ నుంచి నేరుగా వెళ్లే విమానాలపై నిషేధం విధిస్తున్నప్పటికీ మరో దేశం మీదుగా ప్రయాణికులు తమ దేశం చేరుకోవచ్చని కెనడా స్పష్టం చేసింది. భారత్​లో చేయించుకున్న కొవిడ్​ టెస్ట్​ను తాము పరిగణించమని పేర్కొంది. తమ దేశానికి రావాలంటే ఇతర దేశాల్లో పరీక్షలు చేయించుకోవాల్సి ఉంటుందని చెప్పింది.

ఇదీ చదవండి:అంతర్జాతీయ విమానాలపై మరోసారి నిషేధం పొడిగింపు