లాస్ ఏంజెల్స్లో జైలు శిక్ష తప్పించుకోవాలనే కోరికతో వింత ప్రయత్నం చేసి ప్రాణాల మీదకు తెచ్చుకున్నారు కొందరు ఖైదీలు. జైల్లో కరోనా సోకితే తమను ఇంటికి పంపిస్తారని భ్రమపడి, 30 మంది ఖైదీలు వైరస్ బారిన పడ్డారు.
మాస్కులు, వేడి నీళ్లు...
ఎలాగైనా వైరస్ తెచ్చుకుని జైలు నుంచి విడుదల కావాలనే పట్టుదలతో.. ఖైదీలు ఓ పన్నాగం పన్నారు. రెండు బృందాలుగా విడిపోయారు. నర్సు వైద్య పరీక్షలు నిర్వహించడానికి తమ వార్డుల్లోకి వచ్చేముందే ఓ డ్రమ్ నిండా వేడి నీటిని సేవించారు ఓ బృందంలోని ఖైదీలు. వేడి నీరు శరీర ఉష్ణోగ్రను పెంచుతుందని భావించారు. దీంతో వారికి కరోనా లక్షణాలు ఉన్నట్లు వైద్యులను నమ్మించాలనుకున్నారు. మరో బృందంలోని ఖైదీలు.. ఒకే మాస్కును మార్చి మార్చి తాకి, వాసన పీల్చారు. దీంతో ఎవరో ఒకరి నుంచి వైరస్ వ్యాపిస్తుందనుకున్నారు. అనుకున్నట్టుగానే, రెండు వారాల్లో 30 మందికి కరోనా పాజిటివ్గా తేలింది. వీరి చర్యలు జైల్లోని సీసీటీవీ కెమెరాల్లో నిక్షిప్తమైంది. దృశ్యాలను చూసిన అధికారులు నివ్వెరపోయారు.
అమెరికాలో ఇప్పటి వరకు 25 వేల మంది ఖైదీలు వైరస్ బారిన పడ్డారు. 350 మంది మృతి చెందారని కాలిఫోర్నియా విశ్వవిద్యాలయం, లాస్ ఏంజెల్స్ స్కూల్ ఆఫ్ లా అనధికారిక అధ్యయనాలు పేర్కొన్నాయి.
ఇదీ చదవండి: లాక్డౌన్లో ఇలా చేస్తే తలనొప్పి దూరం!