కరోనా వైరస్ నియంత్రణలో నిర్లక్ష్యంగా వ్యవహరించారని ఇప్పటికే అపవాదు మూటగట్టుకున్న బ్రెజిల్ అధ్యక్షుడు జెయిర్‌ బొల్సొనారో.. మరోసారి చిక్కుల్లో పడ్డారు. తన కుటుంబ సభ్యులను క్రిమినల్ కేసుల నుంచి కాపాడుకునేందుకు ప్రయత్నించారన్న ఆరోపణలకు బలంచేకూర్చేలా ఓ వీడియో బహిర్గతమైంది. సుప్రీంకోర్టు విచారణలో భాగంగా ఇది బయటకు వచ్చినట్లు తెలుస్తోంది.
క్రిమినల్ కేసులో నేరారోపణలు ఎదుర్కొంటున్న కుమారుడిని రక్షించుకునేందుకు బొల్సొనారో ప్రయత్నిస్తున్నారని ఆరోపించారు బ్రెజిల్ మాజీ న్యాయశాఖ మంత్రి సెర్జియో మోరో. పోలీసు ఉన్నతాధికారులను మార్చేందుకు యత్నించారని తెలిపారు. అందుకే తాను పదవి నుంచి తప్పుకుంటున్నట్లు ప్రకటించి.. గతనెలలో రాజీనామా చేశారు.ఈ విషయంపై బ్రెజిల్ సుప్రీంకోర్టు దర్యాప్తు చేపట్టింది.
ప్రస్తుతం విడుదల చేసిన వీడియోలో తన కుటుంబ సభ్యులను కాపాడుకోలేకపోతున్నానని కేబినెట్ మీటింగ్లో బొల్సొనారో అసహనం వ్యక్తం చేసిన దృశ్యాలున్నాయి. అవసరమైతే మంత్రులను, పోలీసు శాఖలో అధికాలను మార్చయినా తన కుమారుడిని రక్షించుకోవాలనే తాపత్రయం వ్యక్తం చేసినట్లు అందులో తెలుస్తోంది.