'ఆగస్టు కల్లా బలగాల ఉపసంహరణ పూర్తి'

అఫ్గానిస్థాన్​ నుంచి తమ సైన్యాన్ని పూర్తి స్థాయిలో వెనక్కి రప్పించనున్నట్లు అమెరికా అధ్యక్షుడు జో బైడెన్ తెలిపారు. ఆగస్టు 31 కల్లా ఈ ప్రక్రియ ముగుస్తుందని వ్యాఖ్యానించారు.

అఫ్గానిస్థాన్​లో అమెరికా జరిపిన రెండు దశాబ్దాల యుద్ధం దాదాపుగా ముగిసింది. ఆగస్టు 31 కల్లా అఫ్గాన్​ నుంచి తమ సైన్యం పూర్తిగా నిష్క్రమించనుందని అమెరికా అధ్యక్షుడు జో బైడెన్ తెలిపారు. ఈ ప్రక్రియను వేగంగా పూర్తి చేయడమే క్షేమదాయకమని వ్యాఖ్యానించారు.

సైనికులను పూర్తి స్థాయిలో వెనక్కి రప్పించేందుకు అమెరికా యంత్రాంగం కృషి చేస్తున్న నేపథ్యంలో.. దేశ నిర్మాణానికి తాము అఫ్గానిస్థాన్​ వెళ్లలేదని బైడెన్​ అన్నారు. అఫ్గాన్​ నేతలు ఒకచోట చేరి భవిష్యత్తును నిర్మించుకోవాలని వ్యాఖ్యానించారు.

అఫ్గాన్​ నుంచి అమెరికా బలగాల ఉపసంహరణ నేపథ్యంలో తాలిబాన్లు రెచ్చిపోతున్నారు. పూర్వం తమ అధీనంలో ఉన్న ప్రాంతాలను తిరిగి తమ నియంత్రణలోనికి తెచ్చుకుంటున్నారు. అయినప్పటికీ బలగాలను వెనక్కి రప్పించడం సరైన నిర్ణయమే అని బైడెన్​ సమర్థించుకున్నారు.

ఇదీ చదవండి:'వందేళ్లయినా తాలిబన్లు ఆ పని చేయలేరు!'