అఫ్గానిస్థాన్లో తాలిబన్ల దురాక్రమణ తర్వాత.. అమెరికా వాసులను వెనక్కు రప్పించడంలో విమర్శలు వ్యక్తమవుతున్న వేళ.. అమెరికా అధ్యక్షుడు జో బైడెన్ (Biden Afghanistan) శుక్రవారం స్పందించారు. అఫ్గాన్లో చిక్కుకున్న అమెరికావాసులను కచ్చితంగా తమ స్వస్థలాలకు చేరుస్తామని హామీ ఇచ్చారు. కాబుల్ విమానాశ్రయంలో విమానసేవలకు అంతరాయం కలగకుండా తాము భద్రతా చర్యలు చేపట్టామని బైడెన్ తెలిపారు. సైనిక విమానాలే కాకుండా, పౌరుల చార్టర్లు, ఇతర దేశాల విమానాల రాకపోకలకు కూడా రక్షణ కల్పిస్తున్నామని చెప్పారు. నిస్సహాయులైన అఫ్గాన్ పౌరులను తమతో పాటు తీసుకువచ్చేందుకు స్వచ్ఛంద సంస్థలు ప్రయత్నిస్తున్నాయని చెప్పారు.
క్లిష్టమైన ప్రక్రియ..
అఫ్గాన్లో అమెరికా పౌరల భద్రతే తమ ప్రధాన లక్ష్యమని వివరించారు బైడెన్. అఫ్గాన్(Biden Afghanistan) నుంచి పౌరులను తరలించడం చాలా క్లిష్టమైన ప్రక్రియ అని పేర్కొన్నారు.
" అఫ్గాన్ నుంచి వాయు మార్గంలో తరలింపు అతి క్లిష్టమైన ప్రక్రియ. ఈ ప్రక్రియ చరిత్రలో నిలిచిపోనుంది. అఫ్గాన్లో చాలా కఠినమైన పరిస్థితుల్లో మా బలగాలు పనిచేస్తున్నాయి. కాబూల్‌ విమానాశ్రయంలో మా బలగాలతో కట్టుదిట్టమైన భద్రత ఉంది. విమానాశ్రయం వద్ద 6 వేల మంది భద్రతా సిబ్బంది ఉన్నారు. మిలటరీ విమానాలు మాత్రమే కాకుండా ఛార్టర్‌ ఫ్లైట్లు ఉన్నాయి. పౌరులను తరలించేందుకు ఈ విమానాలు ఉపయోగపడతాయి. జులై నుంచి ఇప్పటికే 18 వేల మందిని తరలించాం. ఆగస్టు 14 నుంచి సైనిక విమానాల్లో 13 వేల మందిని తరలించాం"
- జో బైడెన్, అమెరికా అధ్యక్షుడు
కాబుల్‌లో చిక్కుకుపోయిన వారిని తరలించే ప్రక్రియలో జాప్యం జరుగుతున్న క్రమంలో.. అధ్యక్షుడు బైడెన్ స్పందించారు. కాబుల్ నుంచి అమెరికన్లందర్నీ క్షేమంగా వెనక్కి తీసుకొస్తామని అభయమిచ్చారు. ఈ మేరకు శుక్రవారం రాత్రి ఆయన శ్వేతసౌధం వద్ద విలేకరులతో మాట్లాడారు. ‘‘కాబుల్‌లో కనిపిస్తున్న దృశ్యాలను చూడాలని ఎవరూ అనుకోరు. మానవమాత్రులెవరూ వాటిని జీర్ణించుకోలేరు. అక్కడి విమానాశ్రయంలో నిరీక్షిస్తున్న వారిని తీసుకొస్తాం’’ అని అన్నారు. అయితే ఈ ప్రక్రియ ఎప్పటిలోగా పూర్తవుతుందన్నది ఇప్పుడే చెప్పలేమన్నారు.
ఇదీ చూడండి:Afghan Crisis: అమెరికా ఖర్చు ఘనం- ఫలితం మాత్రం...
