ట్రంప్​ 'గ్రీన్​కార్డు' నిబంధనకు బైడెన్​ చెక్​

ట్రంప్​ హయాంలోని కీలక గ్రీన్​కార్డు నిబంధనలపై కోర్టుల్లో ఉన్న కేసులను వెనక్కి తీసుకుంది జో బైడెన్​ యంత్రాంగం. ఫుడ్​ స్టాంప్​ వంటి ప్రజా సేవలు పొందే వలసదారులకు గ్రీన్​కార్డు మంజూరు చేయకూడదన్నది ట్రంప్​ నిబంధన. దీనికి వ్యతిరేకంగా అమెరికా కోర్టుల్లో అనేక వ్యాజ్యాలు దాఖలయ్యాయి. వాటికి వ్యతిరేకంగా ట్రంప్​ బృందం పిటిషన్లు వేసింది. వీటినే తాజాగా బైడెన్​ యంత్రాంగం వెనక్కి తీసుకుంది.

ఫుడ్​ స్టాంప్​ వంటి ప్రజా సేవలు పొందుతున్న వలసదారులకు గ్రీన్​కార్డు ఇవ్వకూడదన్న అమెరికా మాజీ అధ్యక్షుడు డొనాల్డ్​ ట్రంప్​ నిబంధనను తిరగరాసేందుకు చర్యలు చేపట్టింది.. ప్రస్తుత అధ్యక్షుడు జో బైడెన్​ యంత్రాంగం. ఇందుకు సంబంధించి.. ఆ దేశ సుప్రీంకోర్టుతో పాటు ఇతర కోర్టుల్లో ప్రభుత్వం తరఫున ఉన్న వ్యాజ్యాలను ఉపసంహరించుకుంది.

ఈ నిబంధననలు సవాలు చేసిన వ్యక్తులు, రాష్ట్రాలతో బైడెన్​ యంత్రాంగం.. ఒప్పందం కుదుర్చుకున్న కారణంగా.. దీని చట్టబద్ధతను సుప్రీంకోర్టు ఇక సమీక్షించదు. దేశవ్యాప్తంగా ఈ నిబంధనను తొలగించాలంటూ ఫెడరల్​ జడ్జి ఇచ్చిన తీర్పునకు వ్యతిరేకంగా దాఖలైన అభ్యర్థనలను కూడా ఉపసంహరించుకుంది అగ్రరాజ్య న్యాయశాఖ.

2018లో ఈ నిబంధనను ప్రతిపాదించింది ట్రంప్​ ప్రభుత్వం. ఇలా చేస్తే.. సొంతంగా బతకగలిగే వారు మాత్రమే అమెరికాలోకి వస్తారని పేర్కొంది. ఫుడ్​ స్టాంప్​, వైద్య సహాయం, హౌసింగ్​ ఓచర్లు ఈ ప్రజా సేవల జాబితాలో ఉన్నాయి.

ఈ నిబంధనను సవాలు చేస్తూ ఆ దేశ న్యాయస్థానాల్లో అనేక పిటిషన్లు దాఖలయ్యాయి. వాటి వ్యతిరేకంగా ట్రంప్​ ప్రభుత్వం వ్యాజ్యాలు దాఖలు చేసింది. వీటినే తాజాగా బైడెన్​ ప్రభుత్వం వెనక్కి తీసుకుంది.

ఈ నిబంధనతో అటు ప్రజలకు.. ఇటు ప్రభుత్వ వనరులకు ఏ విధంగానూ ఉపయోగం లేదని హోంల్యాండ్​ సెక్యూరిటీ విభాగం తాజాగా.. ఓ ప్రకటనలో వెల్లడించింది.

ఇదీ చూడండి:-బైడెన్​ బృందంలో మరో ఇద్దరు భారతీయ అమెరికన్లు