మాస్క్​ పెట్టుకున్నందుకు చట్టసభ్యుడికి బెదిరింపులు!

అమెరికా కేన్సస్​లో ఓ వ్యక్తి తనను కొడతానని బెదిరించాడని ఆసియన్​ అమెరికన్ చట్టసభ్యుడు ఒకరు ఆరోపించారు. ఆసియన్​ అమెరికన్ల పట్ల జాతి వివక్ష వార్తల నేపథ్యంలో ఈ ఘటన ప్రాధాన్యం సంతరించుకుంది.

మాస్క్​ ఎందుకు పెట్టుకున్నావని ఓ వ్యక్తి తనపై దాడి చేస్తానని బెదిరించాడని అమెరికా కేన్సస్​ రాష్ట్రంలోని ఆసియన్ అమెరికన్​ చట్టసభ్యుడు ఆరోపించారు. అమెరికాలో ఆసియన్ అమెరికన్లపై వరుస దాడులకు సంబంధించిన వార్తల నేపథ్యంలో సాక్షాత్తు చట్టసభ్యునికే బెదిరింపులు రావడం చర్చనీయాంశమైంది.

"కేన్సస్​లోని ఓ బార్​లో ఉన్నాను. అప్పుడు ఓ వ్యక్తి మాస్క్​ ఎందుకు పెట్టుకున్నావని ప్రశ్నిస్తూ బూతులు తిట్టాడు. కరోనాను వ్యాప్తి చేస్తున్నావా అని అడిగాడు. కాసేపటి తర్వాత నన్ను తంతానని బెదిరించాడు."

-రీ షూ, కేన్సస్​ రాష్ట్ర చట్టసభ సభ్యుడు

గతేడాది మార్చి నుంచి డిసెంబర్ వరకు అమెరికా వ్యాప్తంగా ఆసియన్ అమెరికన్లపై 3 వేలకు పైగా దాడులు జరిగాయని ఎఫ్‌బీఐ నివేదిక తెలిపింది. 2019లో ఈ తరహా దాడులు కేవలం 216 మాత్రమే జరగ్గా.. 2020లో దాదాపు 14 రెట్లు పెరిగాయి.

ఇదీ చదవండి:ప్రవాస ఆసియన్లపై దాడుల పట్ల సత్య నాదెళ్ల విచారం